Kiendervakánsiewèrk Well, gefelicitierd mit et 50 jörrig jubileum.

Et was ien 2002 dat de sjef bouwploeg John Driessen van KVW Well meej persoeënlek het gevrògd um names de organisasie van et KVW beej de bouwploeg KVW te wille kômme en mit daorbeej de extra verantwaordelekheid : Et organisiere van de survaivel! Ik voond et hieël biezoonder dat ik dur John hiervur gevrògd wier en hoefde d’r nie lang ovver nao te deenke.
Et is fijn um ’n stentje te kunne beejdrage as vader van twieë dochters, Angelien en Kim die vur et urst dat jaor ginge mitdoen àn et KVW Well. En ik dôcht òk hoe moi et is dat ik as buutendörpse (Venroy) hiervur gevrògd wèr.
Alle jaore dat oons twieë dochters aktief àn dit KVW Well programma hebbe mitgedaon heb ik dat van hieël doeënbeej mit mugge make en dat was hieël biezoonder!
De energie, et plezier ien de samewerking, saamhuurigheid en vurál d’n ienzet van alle betrokke dörpsgenoeëte die ieder jaor wèr dit KVW hebbe kunne doen slage, is gewoeën fantasties te noeme.
Ik heb persoeënlek echt de meugelekheid gehad um beej et KVW mienen sportieve achtergroond en persoeënleke creativiteit ôp de survaivel te hebbe kunne bôtviere. Alle wekzaamhede en jaore die ik ien de bouwploeg KVW heb mit mugge make (grei ôphale vur de rômmelmèrt, vergadere, ôpbouwe KVW terrein, rômmelmèrt, survaivel, spoeëketocht, tonieëlstukskes en afbrèke KVW terrein mit ôpruume as afsluuting) et was allemòl fantasties! Dat hai ik allemòl noeits wille misse!

André Boom

 

Afvalcônteeners en staoke.

Afval en staoke ging ôp et eind van de jaore 90, same. Et was ‘n sport um ze wennig meugelek afval af te voere. Dat gebuurde toen en nòw mit de klène, platte kar, die Wiel Reiniers nog gebruukte as tèntewage. Vanaf dat weej nòr et evenemènteterrein ginge wier et allemol lástiger. Staoktônne en vuurkörve môssen d’r kômme mit staokvergunning en brándblussers. Daornao hàn weej ‘n ándere ôplôssing um et gemekkeleker te make. Weej gebruukten enne 6 kuups cônteener dèn roeëdgluiend gestòkt wier……….
Et èchte afval göt nòw ien ennen èchten kônteener. Papier apart en zoeë is d’r ien de loeëp der jaore ‘n èchte afvalstraot gekômme. Glas göt nor Sjef.

Arno Simons

 

Survival vroeger

Hallo meense van Well.
Meej is gevrògd um ‘n stukske te schrieve òvver de beginjaore van de survaivel, ‘n actievieteit die tôt ôp d’n dag van vandaag nog ieder jaor ‘n hieële heppening vur alle kiender en leiding is.
Weej zien daormit begônne ien et Bèreven ôp de Vôssenheuvel. Robin (?) Hebben, Rommert van Jan Brandsma, Toeën Rutten en ik. Vanalles hàn weej beejèn geprakkezierd.  Mit touw en hoolt en buuze en tônne, ennen hoeëp water en môdder kwame weej al ‘n hieël ènd. De vurbereidinge ôp zich ware al prachtig want weej môsse natuurlek zelf urst alles uutprebiere. ‘N paar vurbeelde: d’r wier ‘n kabelbaan gemàkt…. Grad Rothoff môs die uutprebiere, dèn ging àn die kabelbaan hange en toen heej bòvve de brándnetels hông, reejde Math Peeters mit d’n tractor waor dat gevaarte mit gespanne stoond ‘n stuk nòr vuur zedat Grad ien de brándnetels hông. Weej laoge ien ennen deuk toen Grad zei :” lòt dat mar ie-ie-iemand ánders doen”.
Òk hàn weej ‘n spel ôp et Leukermeer. Huub Martens, Jan Groenen en ik môsse ‘n vlôt àn de kánt legge. Jan dôcht: “ik stap af”, heej minde dat heej ôp de kánt stoond, mar dat hai heej verkierd gedôcht…… moes ging heej oonder, hoestend en proestend kwaam heej baove en weej hàn de bôks nat van et lache.
Ôp de lokasie beej de Kubus was de survaivel ien de Bánd en roondum ‘t kastieël. Ien de wei achter et kastieël hàn weej “kratstapele” verzônne. Mit ‘n stellage van kratte en steigerpiepe ‘n geweldig spannend spel. Mit afbrèke stoond Huub Martens baove ôp de traplieër um die buuze lôs te slaon. Toen heej die klem van de buus lôs sloeg, viel heej vier mèter nòr oonder (valle duut Huub nog steeds regelmaotig). Mar Huub voond et belangriek dat zien sigret nog ien ziene moond zaat en nog bránde òk!
Òk nog ‘n geval dat ik noeits zal vergète is ‘n waterspel ien de Bánd, weej môsse òvver ‘n buus klimme, Jan Groenen was de steun àn et zuuke ien et water, hai um gevoonde, ging d’rôp staon en toen hai heej enne nagel dwars dur ziene voet.
Et was áltied gezelligheid ten top mit alle vrijwilligers en kiender die d’r mar ál te gèr mit dun. Ze zwart as ‘n vèreke en stinkend as ôtters kwame ze trug ôp et KVW terrein, muuj mar vôldaon!! (D’r was òk mei leiding beej die ôp hakke en mit ‘n handteske dun survaivele O.M.G)
Et was ennen tied um noeits te vergète, mit fieëskes keumt et nog duk ter sprake, weej hebbe d’r nog áltied veul schik um.

André Sijberts

 

Bouwploegsjef

Heej kiender en Wellse meense.
D’r is meej gevrògd um ‘n stukske te schrieve vur et 50 jörrig jubileum van et KVW.
Nòw, geej rôlt d’r eigelek ien as ôw kiend of kiender nòr et KVW gòn. Toen was et nog beej de Kubus. Ik wier lid van de bouwploeg. Nòw, dat heb ik gewieëte. Toen was et gruupke bouwploegers nog ‘n man of 8-9. Weej stoonde oonder leiding van Jan Groenen, de sjef van toen. Enne meens van rècht dur zieë en zien mening áltied klaor. Heej hai de zaakjes goed ôp orde. Wat ware de groeëte klusse ien die ánderhalve wèk? Tènt ôpbouwe, bakkraom nog uut steigerpiepe make, krömkes ôpbouwe, rômmel ienruume vur de rômmelmèrt, iengang make. Dat dun weej toen mit ieënen ôplegger, JPJ Janssen wage en 1 platte kar. Et twedde jaor wier meej gevrògd of ik mit Jan mit woi loeëpe en ien et bestuur kwaam. Wat hebbe weej dat jaor gelache. Weej hàn allebei ennen halven stofjas àn. Beschuut fluite ‘s náchs ien de Kubus, ziejwielekes en ‘n vlag beej Huub Martens òp ziene fiets gemàkt. Dèn was daags tevurre gevalle mit nòr huus fietse. Zoeë, et derde jaor stoond ik as sjef van de bouwploeg. Ik woi wèr terug nòr d’n bôs. Dat is dus et evenementeterrein gewòrre. Niemèr zun luukse as beej de Kubus. De urste paar vergaderinge kreeg ik wel ‘n bitje tègespraak ôp dat vurstel um te verhuuze. Zeas et veilig aoverstèke van de kiender, gèn WC, genne stroeëm en hoe môt dat mit de ienkômstebrôn: De Rômmelmèrt. Weej hàn vergadering mit de bouwploeg, die was oondertusse al iets grötter geworre, die stoonde metieën áchter meej. Dus hebbe weej et d’r dör kunne kriege beej et bestuur. Áchteraf was dit enne goolden zet. Rômmelmèrt mieër bezuukers. Veul mieër plàts vur de kiender. Ien die jaore dat ik sjef was zien d’r òk wat dinger beej gekômme. Neeje tènt, enne legerôplegger dèn weej umgebouwd hebbe as kantoeër, enne vrachtwage dèn ze midde ien de nácht hebbe gehàld. Dit is wel allemòl mit de áldere garde van de bouwploeg en et bestuur bespraoke. Weej hebbe toen ter tied eige keukes gemàkt, die zien d’r nog steeds. Et urste jaor ôp et evenementeterrein, ik was bèst wel zenuwèchtig.
Weej ginge vort ien kolònne nòr et terrein toe, dat was ‘n moi gezeegd um et grei achter mekaar beej Bart van de plàts te zien gaon. De bouwploeg zette d’n Rijksweg af, want de meiste ware nòw òk gedieplomierd verkeersregelaar vur evenemènte. De 2 tènte wiere ôpgebouwd en de tènt al ‘n bitje iengeruumd, et ging van ‘n leien dekske. De zaoterdag wiere de ôpleggers beej de tènt gezet, uutgeruumd en alles ôpgebouwd. Weej bleeve daor slaope. ‘s Mèns alwèr vroeg ôp, ôngedeuldig, spanning ien de kop. Weej hàn ien dèn tied veul reklame gemàkt vur de rômmelmèrt, et wier ‘n drukte van jewelste!!
De Wellse meense kôsse d’r mit de huufkar hin. Nao dèn zôndag as weej alles ôpgeruumd hàn keumt oonder et genôt van ‘n bierke de moisten aovend, man wat hen weej ien die jaore gelache!
Ôp mòndag d’n bôsspeldag, de kiender verzamelden zich beej Vink ôp de parkierplàts. Nòw kwaam et urste momènt mit de kiender aoverstèke beej de Rijksweg. Nòw, de hieële kruusing afgeslote mit oons verkiersregelaars en de pliessie. Zoeë liepe de kiender nòr de zándberg. Vanaf dèn tied is et tuutje ôntstaon, tuut tuut tuuterdetuut vanuut de auto’s, de kiender allemòl zwaaie…. Moi woh!
De mòndag is begônne, weej gòn et terrein ienrichte; zwembad, roetsbaan, tèntjes vur de kiender, knutseltènt enz. enz. enz. Zoeë de kiender wèr trug en helpe aoverstèke.
Zoeë ôp nòr d’n dinsdag, de kiender ôpvange beej Vink, ze zien nòw mit de fiets. Vandaag ôp 2 plàtse aoverstèke, Rijksweg en Wezerweg. Zoeë de kiender vur et urst ôp et terrein, gewèldig um te zien. Weej mit de bouwploeg gòn oons al vurbereide ôp de survaivel van woensdag dwars dör et bôs hin. Zoeë de woensdag, enne lange, moien dag mit survaivel en spoeëketocht. Dan dônderdag, alwèr et einde vur de kiender mit de eindvurstelling, waor weej mit de bouwploeg òk mit dun, wat ieder jaor gekker wier.
Vur de bouwploegers nòw wèr ôpruume tôt d’n duuster en de rest is vur vrijdags. Wat ‘n beginwèk as sjef van de bouwploeg ôp de neeje lokasie!
Zoeë, hier nog wat klène dingskes die weej hebbe mitgemàkt.
Dur poele water reeje um et bestuur nat te make, kroepend óvver et terrein, de twieë schàtjes ôp d’n tendum, Jan Groenen begrave, lachende kiender, auto vanuut bestuur verstoppele……..
Zoeë, die jaore dat ik dit heb mugge mitmake was noeits gegaon zoonder bestuur, entoesiaste bouwploegers, vrijwilligers en zeker mien Mim.
Ik ziej d’r bèst trôts ôp dat ik hier àn heb mugge beejdrage.

Groet, Ôllie áld sjef
John Driessen

 

Dônderdag aovend…….

Dônderdag aovend, d’n aovend dat et èchte wèrk vur de bouwploeg wèr göt beginne. Vur et gevuul zit et grei pas net wèr vur ’n paar mònd ien de de trailers, mar d’r is toch ècht alwèr ’n hieël jaor vurbeej. Prachtig um te zien hoe gemotivierd iederieën is um wèr te beginne. Dit bliekt wel uut de geweldige ôpkômst van oons groeëte bouwploeg, die vandaag d’n dag 47 leeje telt. Hier zien weej dan òk erg trôts ôp. Veul hánd make licht wèrk. Waor vroeger keihard gewerkt môs werre mit ’n paar man, göt et nòw allemòl wat hendiger. D’n heftruuk en de veule hendjes make dat et allemòl niemèr zeveul vur stelt. Wel hoefde d’r vroeger mar ieën tènt ôpgebouwd te werre, teggewòrrig zien dat d’r drie. Mit man en macht werre de tènte uut de verschillende trailers geplaard, de herringe de groond ien geslage mit wackers uut et jaor nul, tèntstukke àn mekaar geknöpt, ziejpöl geplàtst en ôpgespanne en as letste de máste d’r oonder mit alle man. Dan nog efkes ’n reundje alles ôpspanne en toe knöppe en daor stòn ze wèr.
Efkes kieke, hoe ging dat òk alwèr mit die ieën tènt ôpbouwe? Et is alwèr ’n tiedje geleeje….. Wiendzijde môt hier, ehhhhh waor keumt de wiend vanaf? Kop touw, kop ring, wat was wat òk alwèr? Gelukkig stöt et ôp de zek, allieën wat d’rien zit is áltied wèr ’n verrassing. Nou ja….. Rôl mar uut, knöp mar àn mekaar, dan kieke weej wel efkes. En jao huur, òk dit jaor is et wèr gelukt!.... De tènt lit precies verkierd um!!!!!! Mit ôpruume toch mar efkes kieke dat weej et ien de juuste zek duun…..en ge wet now al hoe dat wèr göt.
Ônmundig het, stortbuuje, weej hebbe et allemòl gehad mit ôpbouwe. Sôms efkes schuule vur ’n fleenke buuj, mar òk mei mit vuulniszek òvver et shirt mar dur ien de règen umdat et ánders nie klaor is vur d’n duuster. En ohhh wat zien die tènte mei zwaor as d’r ennen beult water ôp stöt.
Tussendur efkes pauze mit koffie/thieë/fris en ’n kuukske en dan wèr gauw dur tôt et duuster is. De tènte stòn en ien d’n duuster werre nog de kratte en plate de groeëte tènt ien gedrage, zedat ze vrijdag metieën kunne beginne mit et ienruume vur de rômmelmèrt. As weej dan ècht niks mèr kunne zien is et tied vur ’n lekker pilske. Mit meistal làtter ôp d’n aovend nog wel ennen döner, as weej d’r tenminste uut kômme òvver de pries.
Ik ziej bliej dat Ron Verrijdt meej destieds gevrògd het um zien take aover te neme en dat ik dit klupke ienmiddels al nege jaor àn mug sture. Mien ôpvôlgers Gijs en Yvo stòn òk alwèr klaor, waordur ik de rôl van vuzitter nog mug gòn ienvulle. Ik heb d’r zin ien en zal meej de kômmende jaore zeker nog ien blieve zette vur dit geweldig, jaorleks terugkierend, dörpsfieëst!

Bart Groenen    

 

Tent ienruume

Wat enne mijlpaol! En wat ‘n ier um ‘n stukske te mugge schrieve.
Mien vrijwilligerswèrk begôs toen Marloes, Danny en Gemma alle drie mit ginge doen àn dit moie evenemènt. Mar wat wilde dan gòn doen? Vur meej ‘n gemekkeleke keuze um pannekuuk te gòn bakke zedat de kiender meej wisse te viende as d’r iets zuj zien. Jaorelang heb ik dat gedaon en ôp verschillende plàtse heb ik gestaon um alle kiender te vurzien van zunnen aoverheerleke pannekoek. Duuzende pannekuuk zien d’r gebakke.
De letste jaore heb ik ôp zaoterdag de tènt mit iengeruumd. Wat ‘n grei, nie te geluuëve wòr et allemòl vandàn keumt. En wat ‘n gezelligheid mit ál die vrijwilligers die kômme helpe! Òk ôp de zôndag was/ziej ik actief bezig um alle bezuukers van koffie en thieë te vurzien. De sfeer is fijn en alle bezuukers gòn mit iets oonder de erm weg.
Ieder jaor as ik nòr et evenementeterrein fiets vuul et ‘n bitje as thuuskômme, et is ‘n fieëst um hier ‘n stèntje àn beej te drage. Ik haop dat d’r nog steeds genoeg vrijwilligers ôpstòn die dit vur de Wellse jeugd meugelek make, want as ge die blieje snuutjes ziet wette wòr ge et vur duut!!
Ik wil ôllie van harte feliecietiere met et 50 jörrig jubileum en tôt snel.

Berna Kempkens

 

Kulturele aktievieteite

Weej wòn de kiender àn zeveul meugelek zake laote ruuke. Zoeë ôntstoond de kulturele aktievieteit, want òk dat is belangriek ien ôw ôntwikkeling. Wel zaochte weej nòr iets dat de kiender zelf môsse dóen. Zoeë kwame weej ien 2008 ôp et tema “de Boerderij” uut beej de kloompendáns van Ròwwen Hèze. Weej zien nòr Hans Simons gegaon um te vraoge of heej daor vur oons iets ien zuj kunne beteikene. Jao, dat wôi heej wel dóen. Môsse weej vur de kleumkes zörge, want daormit kôsse de kiender ritmes klappe/kloppe. Al gauw wier duudelek dat de kooste te hoeëg zun werre as weej die môsse gòn koeëpe. Wat nòw? Ôp de bestuursvergadering et probleem àngekaart en gelukkig krege weej hulp. Ron of Henk kei ieverig: “weej gòn die kleumpkes vur dees aktievieteit zage, et werre gèn èchte kleumkes, mar ‘n bitje mit ‘n knipoeëg. Ik dôcht metieën; die wieëte nie wòr ze àn beginne en heb et nog naogevrògd en gezet dat et d’r wel hieël veul môsse werre, want ieder kiend môs d’r dan twieë kriege ánders kôsse ze nie kloppe. Nee, dat was gèn probleem, dat ginge ze dóen en ze liete zich nie van eur planne afbrenge……
Ze hebbe et klusje gefikst, want ôp d’n dag van de aktievieteit hai ieder kiend twieë kleumkes um et ritme mit te kloppe. Henk en Ron wôn de rest van de wèk niks mèr òvver kleumkes huure. Ze hàn d’r hielemòl genoeg van mit ennen big smail.
Toch was dat ieën van de moiste aktievieteite die weej gehad hebbe en wòr iederieën kei entoesiast àn mit het kunne dóen. Um ‘n moie aktievieteit te kunne viende was toch ieder jaor wel moeilek. De kleumkes hebbe lang beej oons vur et raam gestaon. Ik kôs ze nie weg dóen. Zeveul wèrk!!!
Ik meen dat de kiender et duk moi voonde wat ze te zien of te doen krege. Ik moog et mit organisiere ieder jaor, mar heb d’r mar hieël wennig van gezíen. Ik stoond ien de knutseltènt te zwoege, want ôp d’n dinsdag kwaam iederieën áltied hieël fanatiek nòr de knutseltènt, want et was d’n ursten dag. Weej hàn nie veul tied um wat ánders te gòn doen, dan zörge vur materiaal en ànvoer van allerhande zake. Efkes kieke lukte hieël sôms, mar et meiste môs ik hebbe van huure zegge. En dan mar wèr prakkeziere vur iets mois vör vôlgend jaor.

Bertie Simons

 

KVW vroeger

Beste meense,
Allerurst wil ik gèr et Kiendervakansiewèrk felicitiere mit et 50 jaorig jubileum. Et is toch enne mijlpaol ien de Wellse geschiedenis. Wat is d’r nòw moeier dan dat d’r ieder jaor wèr meense ôpstòn um kiender ’n ônvergèteleke wèk te bezurge.
Ik wil ôllie gèr mitneme ien d’n tied hoe ik et heb belèfd….. oons dochter Kim was toen ruum 2 jaor…… dus ze moog mitdoen àn et kiendervakansiewèrk. Mar ik wilde òk gèr iets doen beej et KVW. ’N paar wèke vur de start van et KVW kwaam Gerard Schonenberg àn de duur um te vraoge of ik genne zin hai um mit te helpe beej de bakploeg. Àngezien ik bekker van beroep ziej voond ik dat wel leuk en et was ’n moie beejkômstigheid dat ge doeën beej de dochter ziet. Dit was ien 1989 ien et Bèreven.
De bakploeg stoond oonder leiding van Jo Vink. Dus ik meldde meej smèns vroeg beej Jo en kôs metieën àn de slag um pannekuuk te gòn bakke en làtter ôp d’n dag, same mit Hans Simons ginge weej broeëd bakke mit de kiender…. Broeëd bakke wil zegge; ’n stukske dieëg uutrôlle tôt enne lange sliert en dan ôp enne stok dreije en bòvve et vuur bakke. De kiender voonde et geweldig.
Et was allemòl erg primitief….. d’r was wel water en stroeëm, mar gèn werm water dus môs d’r water gekòkt werre ien enne groeëte ienmaak kètel en dan pas kôsse weej oonzen afwas doen……. Ál die bek waor et pannekoekbeslag ien hai gezète, die môsse wèr schòn zien vur de vôlgenden dag. Uuteindelek ware ze redelek schòn. Dat wil zegge vur de norme van dèn tied. De Warewet hebbe weej gelukkig noeits gezien.
Nao twieë jaor kwaam oons jôngste dochter Femke beej et KVW en ik dôcht toen; et duurt nog wel ’n paar jaor vurdat oons kiender van de leggere schòl gòn, dan kan ik òk wel wat mieër gòn doen beej et KVW. Toevallig kwaam d’r ’n plàts vreej ien et bestuur en ik wier wèr dur Gerard gevraogd of ik beej et bestuur wilde kômme. Toen heb ik òk de leiding òvver de bakploeg gekrege. ’N Jaor làtter, dat was  ien 1994 verhuusden weej nòr “de Kubus”….wat ’n luxe…..werm water en as et règende kôste lekker nòr binne. Et wier òk allemol wat schònner en uutgebreider. D’r wiere neeje panne en neeje fornuuze gekaocht, d’r kwaam ’n neeje tènt, de alde was knats verslete. De bakgroep kreeg ’n groeëte tènt mit luifel, dat was òk wel nuuëdig want weej hàn ôp dat momènt 275 kiender, dat was vur dèn tied erg veul.
De vurbereidinge van die wèk begôsse 4 mònd van tevurre mit et ôpstelle van ’n dreiboek. En dat was enne goeie zet, alles wat weej dun wier genotierd en zoeë was alles ovverzichteleker. Hans en ik begôsse ôp zôndagmerge um 05.00uur beej de bekkerij van Karel Janssen um pizza’s en Berliner bôlle te make. Die wiere verkaocht ôp de rômmelmert dèn làtter plàts voond beej “de Kubus”. D’r môs wel geld ien et laadje kômme um de hieële wèk te kunne bekôstige. Et was altied ’n fieëst um te zien as de hekke ope ginge van de rômmelmert en de meense ôp alle spulle afsturmden um ze te koeëpe… en daor is tôt ôp d’n dag van vandaag niks àn veránderd got zelf mar kieke….schitterend toch!!
De mòndag was vur meej ’n bitje enne röstdag……. De kiender ginge et bôs ien. Ik kôs ôp mien gemak efkes kieke of weej alles goed iengekaocht hàn en alles nog efkes côntroliere. Twieë mònd van tevurre ging ik ôp pad um de bakploeg te vurme, dat was nog ’n hieële ôpgave. Weej hàn ôngevèr 16 meense nuuëdig um alles roond te kriege. Nao verschillende kiere ennen ôproep te hebbe gedaon hàn weej nog steeds te wennig meense. Dus ziej ikzelf toen mar ôp pad gegaonen heb gewoeën beej elders àngebeld die zelf kiender hàn en gevraogd of ze wilden helpe(wel ’n bitje brutaal maar et werkte wel). Dat was enne meesterzet want al die jaore d’rnao was ieën tillefoontje genoeg um de ploeg roond te kriege.
Weej werkten ien twieë ploege: ieën vroege van 6 tôt 11 uur en ieën late ploeg van 11 tôt weej klaor ware en dat was altied roond 16:00uur. Ik begôs zelf áltied um half vief um de dieëge vur de pannekuuk te make. Dat was vroeg, mar dat was ik as bekker wel gewend. Bòvvendien hàn weej ok nog ôp dinsdags en dônderdags de friet, frikandelle en krokette. En dat òk nog zoonder frietwage zeas ze dèn nòw hebbe. Dus alles ien twieë groeëte frietpanne ôp tòffel en bakke maar!!!!Dat hield wel ien dat de urste groep al um 11:00uur àn de friet zaat en de letste um 14:00uur. Et was allemòl veul wèrk, mar wel leuk en ik kreeg d’r veul energie van um te zien hoe iederieën genoot. Zelf voond ik dat weej ’n geweldig team hàn…. D’r wier hieël veul gelache, weej wisse wat weej àn mekaar hàn en afsprake die weej gemakt hàn wiere naogekômme.
Weej gòn nòw nor et jaor 1997. Ien dit jaor verhuusden weej van “de Kubus” nòr ’n neeje lokasie enwel “Et evenemententerrein”, daor wòr et nòw nog steeds is. Dat was wel efkes umschakele, et terrein was veul grötter en alles môs wèr ôpneej iengedèld werre. Mar et was wel leuk vur de kiender, want die zate wèr ien et bôs en dat was toch spannender. Et wier òk nog wat professioneler. D’r wier nog ’n gröttere tènt gekocht, de bakploeg kreeg neeje schorte en de bouwploeg bouwde ’n hòst kômplete keuke mit vaatwasser en ’n moie toeënbaank. Òk kwaam d’r ’n gröttere kabelbaan beej en…….. weej hàn enne frietwage!!!! Dus weej zetten groeëte stappe. Et moiste moment van d’n dag voond ik smèns as ik um half vief ôp et terrein ànkwaam en alles was nog stil…..hier en daor ‘n vroeg veugelke dat floot, verder was et stil, lekker ’n muziekske d’rbeej en àn de slag “heerlek”. Ja want  um zes uur kwame de urste dames ien d’n bekkerskraom en sômmige hàn ’n ochtendhumeur en ándere stoonde metieën àn….. lache!!!! Mar et was enne leuke en gezelligen tied. Ik ziej ’n bitje gòn telle en ien ál die jaore dat ik d’r was hebbe weej mit z’n alle tusse de 70 en 75 duuzend pannekuuk gebakke. Dat zien d’r erg veul en dat òk dankzij al die dames die same mit oons de hánde uut de mouwe staoke. Weej hebbe veul werk verzet ien ál die jaore en daor hebbe weej echt van genote. As ik nòw et KVW terrein ôploeëp deenk ik nog duk “et was enne moien tied”.
Ik weens et kiendervakansiewerk veul sukses en net zeveul plezier as weej belèfd hebbe beej et vortzette van dees moie aktiviteit en haop van ganser dat et nog lang mug blieve bestaon, al is et allieën mar um al die blieje kiender gezichte ’n wèk lang te zien straole…..
Veul sukses same.

Bert Simons

 

Zwembad KVW

Hierbeej ôp verzuuk ‘n moie herinnering àn et zwembad. Dat is eigelek nie ze gemekkelek want d’r is zeveul gebuurt ien en roondum dat zwembad. Wie is d’r nie ien gegoejd? Et moiste voond ik nog wel de opening van et zwembad.
Ien 2004 is et zwembad dör ‘n paar vrijwilligers van de bouwploeg ienèn gelast um niemèr mit die pek hui te hoeve sjouwe. Daor wier et zwembad tôt dan van gebouwd, pek hui en strui.
Um d’r ‘n officieel tintje àn te gève het de bouwploeg oonder de de vurstelling ôp dônderdag middag et zwembad officieel  geopend mit ‘n vurstelling van Dôlfinarium “HarderWell”. Nòw, ge hàd nog noeits zun vurstelling gezien, wat ‘n ôngeregeld zooitje. Natuurlek ware d’r gèn dôlfijne, mar wel haaje, enne walrus, zieëheund, enne pôtvis en zelfs enne kwietvogel (hieël zeldzaam).
D’r was ennen dômteur dèn die biezoondere zieëdiere ien et gelid môs kriege en dèn môs prebiere um d’r mit dit zooitje ôngeregeld enne moie sjow van te make. Nòw, dat is gelukt, de zieëdiere luusterden nie ècht nòr d’n dômpteur en ze dun mar wat, dat miek et allieën mar moier.
Et högtepeunt was toch wel dèn pôtvis, dat was enne vis mit enne kaokpôt ôp ziene kop (Joop van Els) en toen dèn ôp de kop ien et zwembad gestaon hai, ging dèn pôt niemèr van ziene kop af want dèn was oonder water vakuüm getrokke en dèn ging niemèr lôs…… nao ‘n tiedje plare en trekke mit ‘n paar man lukte et uuteindelek toch um, um lôs te trekke. De spanning was te sneeje en de ôpluchting groeët. D’rnao is d’r ók nog mit alle man gezaocht nor de kwietvogel, mar dèn is noeits mèr gevoonde en wie um alsnog viend mug um hálde.
Et was vur de kiender en elders ’n geweldige opening van et zwembad, weej hebbe d’r nog duk um gelache!!!

Henk Valckx

 

Kiendervakánsiewerk

Vur meej ‘n hieël belangriek evenemènt ien et jaor, want hier krege de kiender de káns um ôp ‘n vrije manier bezig te zien.
De kiender kunne zichzelf vermake ôp hieël verschillende vlakke en ôp eur eige nivo. Wat thuus nie kan, dat mug wel ôp et Kiendervakánsiewèrk.
Al dörfde nie alles mit te doen of uut te voere, want weej passe daor enne mouw àn of prebiere dat ien ieders geval.
Nao zun wèk blieve de herinneringe bewaard dör dinge die de kiender hebbe gemàkt. Vur èlders sôms enne lap stof (wat môtte daor nòw mit?), mar vur de blaage ‘n herinnering àn ‘n moi ôptreije of iets wòrràn ze keihard hebbe gewerkt ien de knutseltènt. Werkstukke die meschien nie hielemòl zien wat weej deenke, mar is dat van belang? De kiender hebbe daor eur ziel en zaligheid ien gelet en dat mikt et de moeite wèrd.
Laote weej mit zien alle d’r vur zörge dat dit fieëst tôt ien lengte van daag dör mug blieve gaon.

Bertie Simons-Poels

 

Leiding

Mit ‘n groep van zun 20 kiender nòr et kastieël loeëpe um spellekes te doen, oonderwèges ‘n paar èlders tège kômme die zegge: “Carin, Wat hedde geej enne fijne groep!”. Ze bedoelden daormit de “schàtjes van jônges”. Vurdat ik hier goed ôp kôs reagiere zet ieën van de schàtjes:”jao, beej Carin is et hieël gezellig want weej hebbe al dukker beej Carin ien de groep gezète.”
Now, mien wèk, mar zeker die van eur kôs niemèr kapôt.
Survaivel ien d’n bánd: Collega leiding hai ‘n wit?? Badpak àn en enne veloersen groeëte badhanddoek!! Zunne hai ik nog nie ien miene kást ligge.
Ik zelf hai ‘n áld badpak + dito T-shirt en ennen versléten handdoek.
Frietliest: Dees heb ik iengevoerd want ‘s mèns wôn ze ‘n frikandel en ‘s middags ‘n kroket.
Ôp dônderdag, as de attraksie et toeliet mit ‘n ándere groep (1 links en 1rechts) same d’rôp. Kôsse weej d’r twieë kieër ôp.
Zelf áltied mit survaivel mit gedaon, allieën de vèrkesrees nie vanwège lenze en zônder kôs ik niks zien. De groepe hebbe dat áltied geakseptierd, mar ôp de vraog of ze wel zánd ôp mien schouwers moge kiepe en mien bieën vôlsmère kôs ik gèn “nee” zegge. Mar ik hield trouwes zelf et net umhoeëg zedat ze d’r vlôtter oonder kôsse. En dat voond ik gèn eenkel probleem.
Jerry Driessen hai mit de survaivel ‘n dikke joggingbôks àn, mar ja nao ál dat water en zánd wier die èrg zwaor en zakte ze d’n hieëlen tied van zien vôt.
Et moiste tema van ál die jaore voond ik “de oertijd” (papiere bôtte van wc rôlle gemàkt, schóen van d’n binnebánd van ennen auto en touw van pek strui.
Superlekkere pannekuuk en òk et broeëdbakke was geweldig.

Carin van den Bergh.

 

50 Jaor KVW Well.

As kiend heb ik zelf noeits mitgedaon àn et KVW umdat et urst áltied oonder de bouwvakvakánsie was en weej zelf mit et gezin nòr de kemping ginge. Weej moge kieze, KVW of Kemping. Umdat ik nie wis wat ze ôp et KVW allemòl dun, was de keuze snel gemàkt. Ik woi nòr de kemping.
Làtter, toen ik wat álder was ziej ik weles gòn kieke beej et KVW en voond et wel erg leuk en gezellig. Dus toen ik zelf kiender kreeg was de keuze snel gemàkt, ze gòn mitdoen.
Zun 25 jaor geleeje is et dus begôs. Ik wier gevraogd um mit te helpe mit de verkoeëp van òllieböl beej de rômmelmèrt ôp zôndag en as leiding van enne groep. Toen was et nog achter de Kubus ien et dörp. Noeits heb ik spiet gehad dat ik “jao” heb gezet en heb et òk ál die jaore mit veul plezier gedaon.
De rômmelmert was òk ’n begrip ien de regio. Áltied ève druk. Um half ellef ginge de hekke ope en kwame de meense as ’n stelleke lôsgelaote stiere et terrein ôprenne. Dat was áltied ’n prachtig gezicht wòr ik ieder jaor van genoot. Dat was vur meej òk et startsein um appels kerse en proemeflappe, frikandel en kroketbruuëdjes plus pizzapeunte te gòn verkoeëpe. “Duut meej d’r mar acht um mit te neme, lekker vur beej de koffie straks”. Meistal ware weej vur et ènd van de mèrt al vet uutverkaocht.
Et was ieder jaor wer spannend mit wie ik leiding was en wie oons hulpleiding was. Et ieëne jaor beej mien aldste dochter en et jaor d’rôp beej de jôngste tôt ze van schòl af ginge en ik toch leiding bleef umdat et ze leuk was. De dankbaarheid van de kiender nao ’n wèk gezellig same dinge oonderneme is ze moi, zelfs nao die wèk roepe ze ôw nog nao ôp straot. Daor duude et vur!
D’n bôsdag ôp mòndag voonde d’r veul de minsten dag, mar dat is veránderd toen weej zand sculpture ginge make. Super leuk en iederieën werkte keihard mit. Ieën jaor hebbe weej zun slecht wèr gehad dat weej allemòl nòr de groeëte tènt ôp et terrein zien gegaon um te schuule.De règen viel mit bek uut de lôcht en et ônwèrde fleenk. Zurge dat alle kiender wèr veilig thuus kwame was toen ’n hieële klus, mar gelukkig is alles goed gekômme. Et hai òk wel wat.
Survaivele ôp woensdag was ’n groeët fieëst. Urst um de buurt starte, um ’n parcoers dur et bôs af te legge. Alle spulle mitsleipe, tasse, handduuk, schoen. Áltied was d’r wel iemand iets kwiet. Làtter stoonde de spelle ôp et terrein ôpgesteld en startten weej allemòl tegeliek. Tusse de middag geniete van ’n bôttram mit gebakke ei.
 ’s Middags was dan d’n Roeien Draod. Heerlek dur de zwarte môdder ôp de crôssbaan. Daornao oonder de sproeier um de môdder uut de hör te wasse. ’s Mèns hàn d’r sômmige nog resjes môdder ien de oere zitte.
Òk heb ik jaore mitgeloeëpe mit de spoeëketocht van groep 8. Ieën jaor was et ze èrg dat ik mit drie kiender begôs en et mit veul pien en moeite mit ieën kiend heb uutgeloeëpe. Oonderwèges mar roepe: “Lòt oons nie schrikke, ik heb bange kiender beej meej!” Et was jòmmer vur de “spoeëke” ien et bôs want die voonde et juust leuk um iederieën de stuupe ôp et lief te jage. Terug ien de tènt d’n aovend afsluute mit ’n bruuëdje kroket of frikandel, dat dan áltied heerlek smàkte. Dan nao ’n paar uurkes slaop ’s mèns wèr paraat staon vur de groep. Helaas is dit làtter aover gegaon ien enne geluidentocht. Òk hierbeej nog ien et bôs gestaon um geluide te make. Làtter is dit aovergenome dur de elders van de kiender van groep 8.
Dׅônderdagmiddag, de vurstelling:
De urste jaore was et karaoke. Áltied ware de liedjes van Kinderen voor Kinderen et populairst. Gelukkig kôsse weej ’n paar jaor làtter zelf beslisse wat weej wilden doen. ’N Liedje, ’n tonieëlstukske of gewoeën laote zien wat ze gemàkt hàn die wèk. Et was wel moeilek um de kiender gemotivierd te kriege hiervur want die zate veul liever ien et zwembad of ien de knutseltènt, mar uuteindelek kwaam et áltied goed en was et enne gezelligen afsluuter.
Mar et allerbelangriekste van Kiendervakánsiewerk Well zien wel de pannekuuk, die zien aoveral ien de regio beroemd. Mit de groepe d’r òk heerlek van genote. Làtter, toen ik de begeleiding van de groep heb aovergelaote àn de jôngere elders heb ik same mit ánder de verkoeëp ôp meej genome. Mit roziene en zoonder roziene mar wel mit ’n fleenke laog soeker. Hônderden, nee duuzende pannekuuk zien d’r gebakke en de meense stoonde ien rije um ze te bemachtige. Bestellinge kwame sôms mit 50 of mier tegeliek binnen. “Wilde d’r nie mieër? Ge kunt ze òk goed ien d’n diepvries beware huur” Helaas hebbe weej d’r òk duk tekort gehad. Mar ja, ge môst sôms òk stoppe mit bakke.
Ik haop dat et nog jaore blieft bestaon en dat ik straks misschien nog mit mien klènkiender mit kan doen.

Chantal van Soest

 

De knutseltènt.

Knutsele ien de groeëte tènt was ieder jaor wèr ‘n fieëst. Weej, as “knutselploeg” hebbe de afgeloeëpe jaore same veul gelache en schik gehad.
De knutselploeg stöt ieder jaor klaor um iederieën te vurzien van vèrf, hoolt, kartôn, stof en nog veul ánder knutselgrei.
Ôp veul kartônne plate verschiene moie teikeninge en wörd, vurzien van ‘n dikke laog vèrf. D’r werre vlagge ôntworpe en gemàkt. Òk wörd d’r getummerd en gezaagd, gesôldierd en gegravierd.
Entoesiast gòn de kiender en de leiding àn de slag mit de verschillende materiale en zoeë verschiene de moiste knutsel -en bouwwerke. Ik viend et leuk as ik hierbeej ‘n hendje kan helpe. Òk deenk -en help ik gèr mit um van ‘n stukske stof ‘n leuk “kôstuum” te make vur de vurstelling.
Òk de bouwploeg keumt ieder jaor um hulp vraoge vur de kôstuums vur de vurstelling, al is dat duk pas net vurdat die vurstelling begint.
Wat ik òk ze moi viend is dat jaore geleeje et KVW virus oonze pap (Piet Welbers) òk wèr te pakke kreeg en heej jaore lang mit veul plezier de kiender het liere sôldiere.
Mar et allermoiste viend ik áltied die trôtse en blieje snuutjes van de kiender as ze eur zelf geknutselde kunstwèrke laote zien.

Groetjes Corina Reiniers

 

Kônteeners en staoke…….

Alles wat nao de rômmelmèrt aover is prebiere weej ze goed meugelek te scheije en òk staoke weej natuurlek grei ôp. Vurál as et van hôlt is. Veul werd verkaocht àn handelare, mar die wille et dan ze goedkoeëp meugelek ôp de kop tikke, et liefst vur niks. Mar daor trappe weej nie ien. As zun dinge d’r àn et ènd van d’n dag nog stòn gòn ze de cônteener ien en dan, wette, dan vliege die handelare ôp dèn kônteener af as vliege ôp ennen hoeëp stroont. Ze hange d’r mei ôp de kop ien. Die hebbe dus niks begrepe van et doel van ál oons werk; geld ôphale um de kiender die prachtige wèk KVW te bezörge.
Mar weej staoke òk veul hoolt ôp en dat viend ik òk wel leuk want ien ennen brandwèrman schuult òk wel ‘n bitje enne piromaan, mar gèn zörg want et göt áltied hieël gecôntrolierd. Urst duun weej dat ien lège òllietônne, mar de letste jaore göt dat ien enne kônteener van Bart Xhofleer, dat göt ‘n stuk gemekkeleker, mar as et te het en te druuëg is duun weej et nie want die prachtige natuur ôp en roond oons terrein wille weej gèr zoeë hálde en dan storte weej et hoolt gewoeën ien enne kônteener.

Edwin Roosen

 

Rômmel ôphale

Hoi! Mienen naam is Emiel Krebbers.
Ze vroege meej um ‘n stukske te schrieve òvver mien belèfenisse mit et KVW ien Well mit as oonderwerp “rômmel ôphale”.
Mien herinneringe beginne natuurlek ien mien kienderjaore, want roond 1975 - 1976 moog ik zelf ôp de kienderrômmelmèrt mien eige grei verkoeëpe ôp ‘n kledje.
Daor zaat ik dan. Zelf hai ik natuurlek nie ze hieël veul. Ien mienen tied ware de speulgoedkáste en/of kamers nog nie ze òvverweldigend as ze teggewòrrig zien. Mar ik wilde toch òk gèr iets ôp mien kledje hebbe ligge, dus gông ik de familie af vur grei. Zeas ‘n prachtig tweddehans koffiezet apparaat (nog jaore lang gebruukt ien de bieb!) of álde buuk, platespeuler, pôtte of panne…. En ik natuurlek bliej. Mar ik gông òk duk wèr nor huus mit ánder moi grei en wat centjes ien de tès.
Toen ik van de leggere schòl nor de middelbare schòl ging, bleef ik helpe beej et KVW, same mit Henk Reiniers. Zoeë kwaam ik uuteindelek terècht beej de bouwploeg. Daor dun weej alle hánd -en spandienste. De kledjes wiere iengeruild vur èchte krömkes, die dur de bouwploeg wiere ôpgebouwd. Nao eenkele jaore kwaam d’r òk ‘n groeëte tènt wòr et grei dat wier ôpgehàld ien et dörp verkaocht wiere vur et KVW.
Zoeë gebuurde et òk enne kieër dat d’r helaas nog ‘n àntal autoos ôp et kermisplein stoonte en weej daordur de tènt nie kôsse ôpbouwe. Dus wiere d’r òproepe gedaon ien Café Walaria en beej Onder de Linden, wòrnao de meiste eigenare urren auto verplàtsten. Helaas deuj ieëne bestuurder dat nie. Dat was vur de bouwploeg nie zun groeët probleem. Want mit ‘n àntal stèrke kèls wier dèn klènen auto ‘n paar mèter verzet, waordur de tènt precies ôp de goeie plàts kwaam te staon. Probleem ôpgelôst.
Nao wat roondzwervinge van kermisplein, de Kubus uuteindelek nòr et evenemèntenterrein.
Nog steeds werd d’r twieë kieër per jaor ôp zaoterdag rômmel ôpgehàld. Dat is wel ‘n hieël geregel, mar dan hedde òk wat.
Urst werre de gèle KVW flaiers roondgebròcht. Die dan vur de ruute kômme as herkenningspeunt.
De bouwploegkèls kômme zeveul meugelek mit auto’s en ànhengers of tractors mit karre. Dan werre d’r beej Xhofleer gruupkes gevörmd en de straote verdèld zedat ieder zien eige dieël van et dörp roond göt.
Dit is áltied ‘n gezellige en vroleke drukte. Ik ziej zelf iengdèld ien et dörp (àn de Maas), duk same mit Arno S, Wim V. En sôms nog àngevuld mit ándere bouwploegsjouwers.
Sômmige dörpsgenoeëte telle d’rôp dat weej nie allieën nève kômme, mar òk àn. Dan stöt de koffie en de vlaai mit likeurtje klaor. Áltied èrg gezellig Hennie!
Dan is d’r natuurlek roond de middag òk ‘n lunchpauze. Dan werre weej verwend mit soep, bruuëdjes en vur ennen eenkeling òk mit hagelslag en sjem. Waorvur hartelek daank lunchdames!
Dan kunne weej d’r wèr vôl teggenàn um ál dat brocante en vitage grei te verzamele beej de vôlgende roonde. Ál dit biezoondere en uutzoonderleke grei vur de verkoeëp göt ien de trailers van de KVW vrachtwages en werd ôp vrijdag en zaoterdag vur de KVW wèk gelôst ôp et evenemènteterrein. Dit gebuurt meistal hieël zörgvuldig en oonder supervisie van oonze Chef. Waorvur daank. Ál mit ál áltied wèr ‘n leuke en gezellige dörpsaktiviteit um mit te helpe en dat nog haopelek hieël veul jaore.

Groetjes, Emiel Krebbers

 

Woensdag terreindag vur de kleintjes as de groeëte gòn survaivele

Al van klèns af àn zien de “klène” dat de “groeëte” ‘s woensdags mit spotieve, álde klier en stevige schoen àn nor et terrein kômme. Ien de knutseltènt werd d’r zwarte verf gehàld en werre d’r zwarte strepe ôp de wange getrokke. Lappe stof werre geschuurd en um de kop geboonde. Wat môtte die kleintjes nie mei hebbe gedôcht; wat is ien ‘s hemelsnaam toch dat survaivele, as die groeëte zich daor zoeë klaor vur môtte make?? Et zal minstes iets zien waor de klène óf jaore nòr uutkieke, óf jaore teggenôp zien, want et liekt wel hieël erg spannend.
Vur de klène zelf beteikent dèn woensdag, röst ôp et terrein. D’r zien namelek de helft minder kiender. Enne gánsen dag de knutseltènt vur eur allieën, gèn bômmetjes van groeëte pummels ien et zwembad, gèn “nie ôp dat springkusse hànge!!” dat dur de geluidsbôkse kleenkt….. Eindelek, wel lekker röstig toch as die groeëte zich ien et zwieët klimme, renne en ploetere ien et bôs. Nee, de klène zien dèn dag de baas òvver et terrein en geniete daor mit vôlle teuge van. Ennen dag ôngestoord speule, kliedere, ekstra duk van de kabelbaan, röstig zwemme……. en asof dat nog nie genoeg is: ‘n tochtje mit de huufkar! Efkes ‘n oonderbrèking ôp d’n dag, dur moi Well en umgèving hobbele en toere. Wat enne schik hebbe kiender ien zun huufkar! En as de leiding d’ràn het gedôcht ète weej oonderweg ‘n lekker ieske of enne pannekoek ôp de hánd. Geniete toch!
En àn et ènd van de middag kômme alle “groeëte” pikzwart trug uut d’n bôs, nat, stinkend, muuj……. Ze hebbe gesurvaiveld, wat dat ien de belèving van de klène òk mug zien, ze zun d’r warschienlek nog wennig zörg van hebbe. Zeas ge vur de hieële KVW wèk hòpt dat kiender ’n hieële wèk vurál ônbezurgd kunne speule en hin doen. Ik zal noeits vergète dat, dat ônbezurgde wel ‘n hieël biezoondere beteikenis kreeg. Daorvur môtte weej ‘n àntal jaore trug, woensdag 23 juli 2014. Dèn dag hielde weej ôp et KVW terrein ieën minuut stilte vur de slachtoffer(tje)s van et baove Oekraïne nèrgestorte vliegtuug MH17. Et was muuske stil oonder die ieën minuut. ‘N ônvergètelek iendrukwekkend hennevel momènt, dat iederieën wèr es deuj beseffe dat ônbezörgd kunne speule, nie vanzelfsprèkend is.
Vieftig jaor KVW, proficiat! Dat d’r nog veul mugge vôlge en kiender daor nog jaore ‘n wèk lang ônbezörgd mugge speule. En wat is et dan moi um jaore làtter te zien, dat as de klène d’r eindelek gröt genoeg vur zien, ze ôp woensdag zelf ien álde klier nòr et terrein mugge kômme, zich zwarte strepe ôp et gezicht trekke, enne lap stof umbiende en d’r zelf áchter mugge kômme wat dat survaivele toch is! En dan hebbe degene die dan klèn zien, wèr enne moie woensdag et terrein vur zich allieën!

Femmie Koppers

 

KVW WELL

Vieftig jaor geleeje ôpgericht dur de oudervereniging. Et toenmalige bestuur bestoond uut: Wiel Reiniers (vurzitter), Fiet Broere (siccretaris) en Frans van Soest (penningmeister).
Et urste jaor mit spelle waormit ze bônne kôsse verdiene vur de originele Jan Vier dreimeule, mit verder ien de wèk minigôlf beej de Wellse Hut. Ôk was d’r ’n sòrt speulplàts mit o.a. ’n stopplàts beej Grad Peters àn de Wezerweg waor ien de graas pannekuuk wiere gebakke.
De vôlgende jaore ware de oonderdieële pannekuuk bakke oonder leiding van Jan Janssen (et bekkerke) en broeëdbakke àn enne stok (dur Karel Janssen) ’n vast oonderdieël.
Weej hebbe ien de loeëp van de jaore ieder jaor ’n hoofdgebuure gehad. Zoeë hàn weej o.a. Bezuuk van de pliessie mit auto’s, motore en ’n vurlichtingstent. De kiender moge ôp de pliessiemotor mit ’n ritje make. Ôk hàn weej d’n brandwèr te gast. Moge die kiende ennen bal van enne paol spuite. Wat òk erg leuk was, was ’n wèk auto’s van Xhofleer beschildere die weej gelènd hàn.
’N Groeët zwembad was òk ieder jaor ennen topper. Frietkraom en pannekuuk ware vaste prik, net as et ies van Thei Meijer.
Et urste jaor startten weej mit medewerking van de Vrije academie uut Venlo. Dat jaor was et thema Cirkus mit ’n echte tènt en as sprèkstalmeister Kees Vane en Herman Mulders as dompteur mit enne prachtigen olifant.
Et urste jaor hàn weej tente gelend van de kazerne Venlo. Et twedde jaor hebbe weej ze zelf gemakt en dubbel tentzeil gekaocht beej Neptunes ien Kessel. De tentpöl mieke weej zelf (die tent is duk verhuurd) e.e.a. was allieën meugelek dur ’n vaste bouwploeg. Die bestoond o.a. uut: Math Peeters – Herman Peters Rit – Piet Welbers – Joep Klabbers  – Sra Klabbers - Wim Weijs – Noud Hebben (verzurgde òk ieder jaor de stroeëm mit ennen aggregaat) – Cuub Winkels. Mit as vaste fotograaf Toon Rutten.
Jan Linders uut Neej Bèrge was oonzen urste sponsor. Gerrit Klabbers verzurgde veule jaore d’n draank tegge ienkoeëp. De kieësboer vur enne fleenke kieës. Ieder jaor kwaam d’n burgemeister ôp d’n letsten dag ôp bezuuk (mit de uutvoering ien de tent) en ’s aoves ennen gezelligen aovend mit alle medewerkers  zun 125 tôt 150 man.. Ôk kreeg iedere groepsleider ’n Rabobanktas mit materiaal en ienhalt.
Subsidie: De Gemeente bergen gaof oons subsidie ôp exploitasiebasis. Dat hield ien dat hoe mieër ge uut gaofd, hoe mieë ge kreegt. Well kreeg mieër subsidie dan alle andere dörpe beejèn.
Rômmelmert: De mert begôs altied mit ennen balônnewedstrijd as opening. D’n urste rômmelmert wier gehalde ien de kaoleschuur van Sra Klabbers. Daornao ôp et dörpsplein. De gemiddelde ôpbrengst vur et KVW was zun ƒ 2000,00.
Ien mien periode (25 jaor) zien d’r 3 vurzitters gewest, t.w. Wiel Reiniers – Wim Holtackers -  Ger Rutten. Oonderstònde persoeëne ware ien dèn tied bestuurslid Mevr. Van Asten – Ria van Vliet – Leonie Baaijma – Hay Daemen – Wiel reiniers – Fiet Broere – Frans van Soest – Gerard Schonenberg – Cuub Winkels – Ger Rutten – Jan Janssen.
Ik weens et KVW alle goeds en veul sukses vur de toekomst!

Fiet Broere (Initiatiefnemer KVW Well)

 

KVW Vroeger

Van 1987 t/m 1997 heb ik diverse funksies mugge bekleije binne et (nog altied) prachtige KVW gebuure. Ik was o.a. penningmeister en vurzitter.
Ge kreegt positieve energie van de vrijen tied dèn ge d’ràn besteide.
Ien de jaore 1989 – 1994 zaate weej beej Màn Zegers ien et Bèreven. ’N Geweldige lokasie, òk al ôntbraok et daor àn de nuuëdige vurzieninge. Vur stroeëm regelde Math Pieëters ennen alde aggregaat van et leger. Dèn wel hieël erg veul herrie makte. Ge kôs um ien Well huure brulle en weej hebbe Màn oeërdöpkes gebrocht!!! Later hebbe weej d’r roondum nog pek strui gezet, ien feite hieël gevurlek. Vur water krege weej van d’n Brandwèr slange en die slote weej àn ôp ’n brandwèrput. Weej krege côntròle van de Waterleidingmaatschappij en môsse direct stoppe mit dees illegale aktiviteit. Weej zien toen mit ’n hieële delegasie nòr er hoofdkantoeër getrokke en hebbe de zaak toch nog mit veul moeite en ôp et nipperke kunne regele.
Ik heb òk ’n echte evacuasie mitgemakt van d’n aldste groep dèn moog toen òvvernachte. D’r braok ’s nachs ’n ônwèr lôs dat zien gelieke nie kent. De groeëte tent stoond vôlledig oonder water en de luchtbedde dreve ien de roonte. Nao middernacht hebbe weej iederieën ien de stroeëmende règen nòr huus môtte brenge en zoeë stoonde weej mit oons verzoope kroost beej de elders àn de duurbel.
Umdat ik làtter àn de ponnyclub was verboonde heb ik d’ràn mit mugge werke dat et KVW sinds 2001 ôp et Knikkerven is. ’N Prachtige lokasie mit wél alle vurzieninge.
Ik haop dat hier nog jaorelang et geweldige kiendervakansiewerk zal en kan werre georganisierd.
Ôp nor de 75!!!

Geert van de Ven

 

Jubileum beejènkômst KVW

Roond 1980 ziej ik Wiel Reiniers ôpgevôlgd as vurzitter van de WBA (Werkgroep Buitenschoolse Activiteiten), KVW en lid van et schòlbestuur (dit heb ik +/- 10 jaor gedaon)
Weej hàn hòst gèn geld, weej lèfden van lieëne, hure en scheenke.
Eige materiaal bestoond uut: geraamtes van krömkes, geraamte van bakkraom, ‘n paar álde gasfonuuze, ‘n afgeschreve tènt van Neptunes, höltere rôlle vur bènk etc.
Ôpslag van et grei was beej de Cômbinasie, de schòl en beej Huijgen.
Beejet KVW lenden weej: steigerpiepe en plènk beej de cômbinasie 120 kratte beej de tuinbouwver. ien de Loi. Brándslange beej de Rank Xerox (Wim Eickmans) Aggregate beej Pierre Haumann en Noud Hebben. Koelkèst beej supermert Klabbers, melktenk vur dreenkwater beej Màn Zeegers. Etc…Etc…
De bouwploeg was ôngevèr 10 man!!! Beej de koffiepauze hàn weej àn ieëne vlaai genoeg!!
De bakploeg bestoond uut 2á3 persoeëne, die bakten van 07:00uur tôt 17:00uur!!
Oons ienkômste kwame van de verkoeëp ôp de rômmelmèrt, de verkoeëp van pannekuuk en de beejdrage van de kastelein van Onder de Linden.
As lokasie hebbe weej gebruuk gemàkt van o.a.: de speultuin (Reinderslooi), de Gaarde (kastieël), et Bereven (ôp de kámp), de Kubus en et evenementeterrein.
Sfeer:
- De sfeer was áltied hieël goed, ánders kunde zeiets nie.
- Vrachtwageànhenger nòr Reinderslooi brenge mit enne BMW persoeënen auto. (Joep Klabbers stoond ôp de schier)
- De bouwploeg miste nao et ôpruume ôp zôndag de WK-finale, ze gezellig was et ôp et terras beej Onder de Linden.
- Gerrit Klabbers verlaor ôp de Rijksweg d’n deksel van de koelkást.
- Weej hàn de hieële wèk Minestronesoep van Nestlé via Wim Weijs.
- De étiekette van de frisdraankflesse ware allemòl bruun van et roestwater.
- Mienen ànhenger wier daags vur de rômmelmèrt gestaole mit ‘n kienderfietske d’rôp.
- Ôp de rômmelmèrt wier et roesje vur ‘n bánkstel allieën verkaocht as et hieële bánkstel wier mitgenome.
- Et urste jaor beej et Berenven (doeënbeej et Leukermeer) ware weej Dave Hendrix kwiet, dat was paniek!!….. Heej was thuus!!.
Belangrieke name uut mien periode:
Wiel Reiniers, Jan Janssen (bekkerke), Karel Janssen, Fiet Broere, Ria van Vliet, Jo Rutten, Annie Peters, Gerard Schonenberg, Math Peters, Piet Welbers, Hai laarakker, Wim Weijs etc.

Vriendeleke groete allemòl,
Ger Rutten

 

DE LEIDINGBESPRÈKING

‘s Woensdag vör et KVW stoond áltied de leidingbesprèking ôp et programma. Ien mienen tied was dat beej Café Restaurant Vink, ànvang 19:30uur en ienklusief twieë kônsumpsies.
Et bestuur wier áltied netjes vurgesteld àn iederieën. Ien dees besprèking kôsse hoofd -en hulpleiding mit mekaar kennis make, ideeje uutwissele, alvast same planne make vur de kômmende wèk en vraoge stelle. De leiding kreeg ôp et einde ‘n tiedschema waor alle aktievieteite ôp stoonde vur die wèk, et EHBO teske en de vlag ging òk mit.
Òk luustere nòr et bestuur dat áltied wel neeje ienfo hai òvver de gang van zake of tips. As d’r groepswieziginge ware, dan was dat mien taak um dat te vertelle. Sôms wel lástig as ge de naam verkierd uutsprèkt, mar gelukkig wier ik dan metieën dör iederieën gekorriezjierd!
Òk ôp dinsdag en woensdag ien de KVW wèk was d’r roond half vier ‘n leidingbesprèking ôp et terrein. Van iedere groep was 1 leiding ànwezig en kôs iedere groep efkes zegge hoe d’n dag verloeëpe was en of ze tegge probleme ware àngeloeëpe (kiender die nie luusterden, ierder nòr huus wôn, ruzie oonderling) of eventueel nog verbèterpeunte. De vurzitter en ik prebierden dan zeveul meugelek ôp te lôsse of ôp te pikke vur vôlgend jaor.
Enne moien tied heb ik gehad as siccretaris van et KVW Well!!!

Gerrie Gramser-Keijsers

 

Knulleke

Toen ik stopte as vurzitter van de W.B.A. (KVW) hàn ze et idee um ‘n eige maskotte vanuut et KVW te verzinne. Ze hàn zoeë ’n ôntwerp klaor en vur de naam wier enne wedstrijd uutgeschreve. Uut dèn wedstrijd wier KNULLEKE gebaore.
Hôw efkes, ien ‘n maskotte môt òk iemes ien, ánders wèrkt ie nie.
Wie o wie strikke weej hier nòw wèr vur???
Toen hàn ze bedôcht, dat as ik stop as vurzitter…… heej …dan hedde geej tied aover!!!
Ik heb hier toch wel efkes òvver nao môtte deenke.
Heb uuteindelek toch mar “Jao” gezet.
En ik môt zegge dat ik d’r nog genne spiet van heb gehad.
Wat is dat moi um te dóen, ien et begin loeëpe de klèn kiender enne kilomèter um ôw hin en dan, nao twieë jaor zitte ze beej meej ôp d’n èrm en wille ze allieën mar beej Knulleke zien.
De kiender, klèn en groeët, viende Knulleke geweldig, zoeë òk die van de bouwploeg. Ik môs enne kieër ien d’n dreimeule mit de kiender, dus dat deuj Knulleke. Die van de bouwploeg hàn wat mit dèn van d’n dreimeule afgespraoke!!!
Heej dreide en dreide mar en knulleke wier ze dôl as ‘n kuuke.
Áchteraf wel lache zeiets en jómmer dat Knulleke nie kan praote.
Ál mit al enne goeien ànschaf  van et KVW.
Haopelek hebbe de kiender d’r nog lang schik mit en plezier van.

Groetjes en tôt gauw, KNULLEKE.

KVW

Ik ziej begôs toen mien eige kiender mit dun, voond dat et òk zoeë huurde, et is genne kienderôpvang. De kiender wiere (gelukkig) grötter en stopten, mar ik wôi dur. Gelukkig mug ik al verschillende jaore mithelpe mit et ienruume van de groeëte tènt. En speciaal bloempöt en vaze. Wurrum? Ik heb oeits gevrògd of dat was umdat miene pap bloemist was?... Mit veul plezier ruum ik dizzen hoek, oondertusse verplàtst  nòr buute , ien. Sortiere ôp kluur en grötte en geniete mar! Ôp mien vraog wurrum ik uut de tènt gezet was kwaam metieën ’n schrik reaksie. “Oei, weej hebbe Gertie afgeweze”. Ziede gek, nee, gèn eenkel probleem, plaoge mug gelukkig!
De zaoterdag en zôndag van et KVW zien mien vakánsie högtepeunte. Gezellig same uutpakke, verwoondere en sôms gruwele van alle “Wellse schatte”. Muuj mar vôldaon as alles wèr klaor stöt vur de groeëte rômmelmèrt. Dan de finale: de rennende bezuukers, de graaiende hánd, et welles nietes spel beej de verkoeëp. En vurál, de tevreeje gezichte, de ôntspanne sfeer en gezelligheid.
Toen ik 50 jaor wier, ôp enne zôndag van et KVW, moog niemand hieraover iets zegge. Ik woi (môs) nòr de rômmelmèrt, mien speciaal verjurdagskadoo! Ekstra genote van dèn speciale verjurdag durdat  dat kôs!
Ik haop dat ik nog lang mit mug doen mit et KVW. Ik ziej mar ’n klèn radertje ien et groeëte gehieël, mar geniet as d’n ôproep keumt of ik wèr mug mitdreije.

Gertie Eickmans

 

Bôsdag KVW

Zôndag ‘saoves nao de rômmelmèrt ginge weej et bôs ien um et gebied vur d’n bôsdag af te zette mit liente. Nao wèkelange vurbereidinge mit de bestuursleeje van KVW wòrien ieder zien eige taak uutwerkte was de kiendervakánsiewerkwèk eindelek begônne. Mòndagaovend was mienen vásten aovend wòrôp ik tuus as bestuurslid vurbereidinge trof vur de uutvoering van KVW. Hánd ien hánd wier d’r ôp mòndagmerge nòr de Wezerweg geloeëpe mit enne groeëte kienderstoet. D’r wiere ien et bôs ôp de zándberg spellekes gedaon. De rugzekskes mit lunch wiere same ôpgepeuzeld en de bouwploeg zörgde vur koffie vur de elders en vrijwilligers en ranja vur de kiender. Vur ieder was d’r iets en iederieën kôs zich nòr hartenlust ien de natuur uutlève. Van boeëmtikkertje, vlagverovere tôt zandsculpture make. Der wiere tekskes, denneappels en van allerlei ánder natuurlek materiaal verzameld en n.a.v. ’n tema wier d’r iets prachtigs gemàkt. Vurál dat d’r water beej gebruukt moog werre was ’n fieëst. Nao afloeëp was de priesuutreiking mit bekendmaking van de winnende groep. Muuj mar vôldaon wier d’r nao de middag wèr nòr de rijksweg geloeëpe um wèr beej te kômme van dizzen dag. Vôl verwachting en spanning wat d’r verder ôp de resterende KVW dagen zuj zien um te mugge gòn belève.

Marlies Wijnen (foto 1^e jaor bôsdag mit Jetske en Yoshi same)

 

Nao de rômmelmèrt

KVW zôndag nao de rômmelmèrt.
Zeas iederieën wel wet is al sinds jaor en dag ôp d’n zôndag de rômmelmèrt ôp et KVW terrein.
As de meiste meense mit de tasse en sômmige mit d’n auto en/of ànhenger knoepvôl ôp huus àn gòn, môt d’r dör de bouwploegkèls en vrijwilligers alles ôpgeruumd werre. Urst môt de groeëte tènt lèg, alles werd netjes gesortierd en ien de juuste cônteeners gegoeid. Daornao wèrd alles wèr iengericht vur et knutsele en buute werre de krömkes verplàtst en umgebòwd tôt tènte wòr de groepe gedurende de KVW wèk de thuusbasis hebbe. As dat allemòl ‘n bitje ien de rij stöt kômme de urste harde werkers van de bouwploeg langsaam de klène tènt binneloeëpe.
Et officiële gedieëlte is dan áchter de rug dus mug d’r wel ‘n pilske gedroonke werre. Dat is al jaore ‘n váste tradisie en daor werd dan òk gretig gebruuk van gemàkt.
Ien et begin zien de meiste nog nie ze luidruchtig, mar hoe làtter ôp d’n aovend, hoe mier lève d’r ien de tènt keumt.
Eenkele jaore geleeje wiere de rôlle vur de eindvustelling van de bouwploeg toen verdèld.(teggewòrrig werd dat dör de schrieversgroep van de bouwploeg gedaon). Toen ginge weej òk geliek oefene, mar dat liep hòst áltied uut de hánd en kwame d’r dinge ien vör die as ‘n tang ôp vèrke sloege en nie bepòld geschikt ware vur de Wellse jeugd.
Zoeë hebbe weej al es enne kieër ‘n zilvere brulleft gehad mit ‘n “echte” kerkdienst en òk hebbe weej ‘n begreffenis mitgemàkt (gelukkig is heej ‘n uur làtter òk wèr verreze), de pastoeër van de bouwploeg het òk nog ‘n kersvers huwelek mugge ienzègene.
Um d’n hônger te stille wier de frietwage wèr geopend en was d’r vur iederieën wat lekkers te ète. Et is wel ‘n stuk loeëpe van de tènt nor de kraom, dus zien d’rbeej die deenke: “ik pik wel wat beej ennen ándere mit….”. ge môt wel ôplette beej wie ge dat duut want d’r zien d’rbeej die dat nie ze gèr hebbe en die beginne dan mit de vörk ien de hánd van de frietjatter te stèke en as ze d’r dan nog nie vanaf blieve is d’r nog 1 ôpsie…. Ien d’n auto gòn zitte mit de duure ôp slôt. Ieder jaor is d’r òk wel iemand van buute de bouwploeg dèn ôp d’n zôndag blieft hange ien de tènt. As dèngéne dan ’n goei stuk ien de hakke het…. Werd heej òk lid van de bouwploeg gemàkt en huurt dan ‘s mòndags smèns òk ôppen tied ànwezig te zien, zoeë hebbe weej al verschillende leeje gerônseld. As de zôn allang oonder is, gòn de urste ôp huus àn, mar dat is vur sômmige ‘n hieële ôpgave en die hebbe dan wat oondersteuning nuuëdig. D’r zien d’r die nie zoonder materiële of lichameleke schaai thuus kômme. Mar d’r zien òk verstendige beej, die blieve gewoeën slaope.
Samegevat: nao ennen dag hard wèrke en bliej dat alles wèr goed is verloeëpe, werd d’r nog ‘n moi fieëske gebouwd…..

Hans Deckers

 

50 jaor bewaking 

Van vroeger uut môs et KVW terrein bewaakt werre.
Ik wieët dat vroeger enne Wim Weys um de twieë uur ‘n reundje liep mit d’n hoond en de zaklámp. D’r is ien ieder geval áltied iemes ànwezig ôp et terrein. Is et nie wakker dan wel slaopend. Toen ik ien et bestuur kwaam wôi ik òk wel daor gòn slaope, mar waor dan?
Ik ging ien de groeëte tènt van de rômmelmèrt ligge ôp ‘n rômmelmèrtbaank.
Dat was gèn sukses en ik heb niks geslaope dur dat gedrup van d’n dauw ôp et tèntzeil. Nao dit KVW zei ik tegge mien vrouw: “Weej gòn enne klène kerreven koeëpe”. Dit was ‘n geweldig idee en sinds dèn tied slaop ik daor as ‘n ruuëske, ik huur hòst niks.
Miene pap (Wiel Reiniers) sliep daor vroeger òk al en nòw ik, en oonze Wilco slöpt òk al jaore beej meej ien de kerreven.
Et zien dus al drie generasies die daor bewake.
Ik haop dat ik nog lang daor mug blieve en dat Wilco et òk nog lang vôl hilt.
Ik geniet nog steeds van ál die blieje snuutjes en dèn schèle wazel dèn daor verkaocht wörd.
Et is ien ieën waord GEWELDIG!!!!!

Groetjes,
Henk Reiniers

 

Bouwploeg soep

Mit rômmel ôphale hàn weej ‘n pötje mit daorien ’n gebit ôpgehàld. Ônverkoeëpbaar dôcht ik en heb dat urges weggelet want dat zuj nog weles vanpas kunne kômme. Kiendervakánsiewèrk.
Ôp mòndag werd d’r broeëd gebakke mit de kiender en die kriege dan òk ‘n keumke soep die ien enne groeëte kètel bovve et vuur wèrm gemàkt werd. As de kiender gewest zien, kriegt de bouwploeg de soep die aover is. Gillie raojd et al, daor kwaam et gebit van pas, ôp ‘n ônbewaakt momènt goei ik dat gebit ien de soep, niemand hai et gezien…..
Toen wier et spannend, wie zuj d’n gelukkige zien? En nao ‘n keumke of wat kwaam Jan Groene, fleenk oonder òvver d’n bòjem mit dèn soeplèpel want daor zit toch áltied et bèste van de soep….
Jan begint te ète en ienèns het heej et gebit ôp ziene lèpel, GODNÔNDEJU!!! Wat is dit nòw wèr???………….
Beej de bouwploeg môtte d’n gánsen dag ôp ôw “hoede” zien, want ánders ziede de Sjaak.

Henk Valckx

 

De keetering

Hoera!!! 50 jaor KVW!!
Et liekt wel as gistere dat et 25 jörrig jubileum gevierd wier.
Mit ‘n paar busse vôl kiender nòr “de Bergen” ien Wanroij.
D’r wier veul gelache hin en trug. Mit ennen big smail ôp ieders gezìcht gápend of slaopend.
Mar et was zeker ennen hieël geslaagden dag. Et liekt nog mar ze kort geleeje dat ik ien d’n bôs ôp de Halve Maon begôs.
Daornao nòr de Kubus wòr de keetering al hieël èrg gemodernisierd wier en van veul gemakke vurzíen.
Same mit de pannekuukbakkers hieël veul schik.
Duk de bôks half nat van et lache en iederieën mit d’n boek vôl. Vanuut de Kubus nòr et evenementeterrein.
En òk daor zörgde de bouwploeg d’rvur dat òk de keetering wèr ôp en top was, wèr hielmòl klaor, af.
Nao 15 jaor alle daag de handduuk wasse vur et KVW, want die ginge ‘s mèns wèr fris en druuëg mit, hiervur òk wèr neeje ôntwikkelinge. De luukse van ‘n wasmasjien en druuëger nòw òk al ien oons bezit. Dus wèr mieër tied um te lache en te geniete van de mafste dinge die ge tège kômt. Oondertusse zal d’r ien ál die jaore wel al ‘n groeët zwembad mit Ranja vôl zien gegaon. Kilomèters pannekuuk, ennen trein vôl mit tônne koffie. Groeëte koelcelle mit ies en ik heb bèrg mit sjips vurbeej zien kômme. Dat is de stèrke kracht van et KVW ien oons Well àn de Maas.
Dus alle krachte bundele en ôp nòr et vôlgende jubileumjaor!!

Henny Peters

 

Kiendervakansiewerk dur de jaore hin.

Begin jaore ’90 ziej ik beej et KVW gekômme. Toentertied was et nog ien de wei beej Màn Zegers ôp de Kámp en de rômmelmèrt ien et dörp. De tènt wier destieds urst ien et dörp ôpgebouwd vur de rômmelmèrt en vervôlges wier dees direct nao de rômmelmèrt wèr afgebraoke en ôpgebouwd ien de wei ôp de Kámp. Toentertied klènschalig en hieël primitief. Weej hàn destieds enne cônteener wòr et grei ien ôpgeslage wier. En òk nog beej Jan van Vegchel ien et schöpke wòr oonder ándere de katrôlle d’r ieder jaor ien en uut môsse. Ge kreegt alles tig kieër ien de hánd, dat is tegge wòrrig wel ánders. Meej wier destieds gevrògd of ik ien et bestuur woi kômme um de bouwploeg ôp meej te neme. Daor heb ik toen ‘jao” ôp gezet en weej hebbe oons ècht wat afgelache die jaor, man schei uut! Jan Korstjaans zurgde áltied vur vur groeëte rôlle strui. Dees rôlle môsse weej dan wèr umpèrse nòr pek strui, waorvan weej dan làtter wèr et zwembad dun make. Dat was werk wòr ge òk fleenk dorst van kreegt, dus wiere daorbeej òk noeëdgedwônge veul pilskes gedroonke. Ôp ’n gegève momènt viel et laaje van de struipek niemèr mit. Eindelek ware ze mit de struipek beej de kar, reejde toch wèr net die kar vuuruut….. Dus daor ledde dan wèr mit ôwwe pak strui vur de groond. Làtter môsse weej weg ôp de Kámp. Schòn dreenkwater en hygiëne wier steeds belangrieker. Weej hàn destieds gèn WC, daorvur wier áltied ’n gat gegrave. Et zwembad wier gevuld mit groondwater, hoe dat d’r uutzaog miek toentertied niks uut. En d’n afwas wier gewoeën gedaon mit kald water, half schòn was òk schòn.Zoeë kwame weej dus beej de Kubus terècht. Hier kôsse weej òk rômmelmèrt hálde, dus et dubbele wèrk wier minder. Ierder tuus ware weej èvegoed noeits. Allerhand vôlk hebbe weej beej de bouwploeg gehad, zelfs enne Canadees mit ziene zoeën. Cees Canadees noemden weej um van Anderegg’s kemping, de áldere generasie kent um nog wel. Heej pròtte allieën mar Engels, wat vur de meiste moeilek zat was. Mar làtter ôp d’n aovend aovend kôs iederieën vort goed mit Cees praote. Ien dèn tied kwaam d’r òk ennen hoeëp neej grei beej. Et àntal mertkrömkes wier verdubbeld, d’r kwaam ’n neeje tènt en de allerurste groeëte uutgave; ƒ 300,00 vur touw, ’n rib uut et lief. Zoeë kwaam ien 1996 Twan Krebbers enne kieër nòr meej toe mit de vraog of weej nie ennen trailer kôsse gebruuke. Heej hai d’r nog enne staon dèn afgebránd was en weej vur niks kôsse kriege. Weej hebbe dit ànbôd àngenome en d’n trailer wier nòr Well gehàld. Beej Klabbers ien et Luuëke wier dèn trailer dur de toenmalige bouwploeg hielemòl ôpgeknapt. Ien dèn tied is òk oons logo gebaore en ’n passende kluurecômbinasie uutgezòcht. Dit alles is tôt stánd gekômme uut spônsering. Weej ware trôts ôp et eindresultaat en mit et 25 jörrig jubileum kôsse weej dan òk vur et urst oonzen eige trailer prissentiere. Ien de loeëp der jaore is de vloot fleenk uutgebreid. Zoeë hebbe weej enne kieër enne Mercedes bakwage ôpgehàld ien Pruuse vur 300 Duits Marke. D’r zaat allieën al vur dat geld àn Diesel ien. Tenke hebbe weej ál die jaore dat weej um hebbe noeits gehoeve.  Heej ròkte as enne schòrstieën en de remme wiere mit et jaor minder. Et was Tinus ziene wage. Ôp ’n gegève momènt remde heej vort ze slecht, dat Tinus áchter ôp de kar van Henk Reiniers knalde ien de stoet.Vanaf toen hebbe weej d’r vort mar ennen trekker vur gezet. Ik zuj zoeë nog ure kunne schrieve, mar òk ik heb ôpdracht gehad um et kort te hálde. D’r is veul veránderd dur de jaore hin, mar wat mugge weej allemòl trôts zien ôp oons kiendervakánsiewerk dat nòw al 50 jaor bestöt! ‘N 50 jòrrig jubileum wòr veul Wellse meense ’n beejdrage àn hebbe geleverd en nog áltied levere. Ik zuj zegge:”Veul succes vur de toekômst!”

Jan Groenen, ald bouwploegsjef

 

Rijmpje…

Ien mien belèving was Kiendervakánsiewèrk vroeger al, och ze fijn.
Dat begôs ien 1977 òk al mit enne rômmelmèrt, ôp et kermisplein.
Zaoterdags ware weej thuus dan bèst wel druk
mit prieskes plekke ôp alle dinge, stuk vur stuk.
‘N dubbeltje of ‘n kwartje, duurder was et nie gauw.
Òvver de kooste dun weej nie flauw.
‘s Zôndag smèns ôpbouwe, mar nie ien zunne luukse kraom um áchter te staon
nee, ‘n kledje ôp de groond, et grei uutstalle en daor maar beej zitte ôp de groond.
Pestoeër Weijsman verrichte de opening van de mèrt, hieël speciaal
daornao begôs de verkoeëp, wie ging d’r mit oons grei àn de haal…..
Weej hàn òk ‘n grabbeltôn en beej oons kôste tuiwke trekke
dan zaat d’r enne gesp àn, mar wat kôs oons dat verrekke….
Weej hàn wèr ‘n paar cènte  of ‘n dubbeltje verdiend,
jao, alles hàn weej van tevurre uutgekiend.
Tussendur, toen òk al, pannekuuk ète, gebakke dur bekkerke Jánsse uut de Groeëtestraot,
nòw nog áltied etzelfde recept, dezelfde smaak en dezelfde maot!
‘s Aoves dan d’n ôpbrengst telle en of dat nòw veul was of nie,
mit ‘n paar geuldes ware weej al écht bliej.
Vôldaon nòr bed, druuëmend van oons verdiende fortuin
‘s Ánderendaags nòr et bôs, beej d’n höltere speultuin.
(Nòw Reindersmeer)
De moiste herinnering is vur meej toch wel ànkômme ôp et terrein, stoond d’r enne VW kèver, hoe vet!
Nevve ál die tènte hàn ze ennen álden auto nèrgezet.
En dan achter et stuur zitte….. vroemmmmm, vroemmmm en van pannekuuk en friet gesmuld,
zoeë ziede mar wèr, ‘n kienderhánd is zoeë gevuld!

Irene Weijs-Vink

 

Rômmelmèrt KVW Well

Ieën van de moiste daag van et jaor, rômmelmèrt Kiender Vakánsiewèrk Well, Al veule jaore wèr ik gevrògd um mit te helpe ien de tènt mit de rômmelmèrt van et KVW ôp zaoterdag en zôndag. De “schik” begint al ôp zaoterdag beej et ienruume van de tènt, man, man wat werd daor toch allemòl ôpgehàld. Bizar, allemòl pôtte, panne, bestek, en wieët ik wat nog allemòl mieër. Schòn mar òk vies, dur meense zoeë vanaf de èttoffel ien doeëze gedòwd, ohhh”deenke ze dan “Dat is moi grei vur et KVW”. D’n hieëlen dag sjouwe um alles moi nèr te zette, zedat de “koeëpwaar” moi ien de kieker stöt.
Dan de zôndag, gezellig mit allemòl vrijwilligers ien de groeëte tènt, wáchte ôp dèn groeëte sturmloeëp. Ieder jaor wèr moi um te zien hoe de urste koeëpers binne kômme renne, asof ze uutgehôngerd zien. Dan begint et spel, sômmige koeëpers wieëte nie hoeveul grei ze ien ieëne kieër kunne pakke en hoe wennig ze d’rvur wille betale. Ik zeg dan mar áltied dat ze et grei van meej allemòl vur niks mit zun mugge neme mar dat, dat nie kan umdat de ôpbrengst vur et organisiere van et KVW is. De meiste gòn dan òvverstag en betale de vraogpries, mar d’r gòn òk sômmige koeëpers mit lèg hánd weg en ik wácht dan gewoeën ôp de vôlgende koeëper…….
Vurál de saamhuurigheid sprèkt meej èrg àn , same ienruume, same verkoeëpe, same ôpruume en daornao, same ’n lekker pilske dreenke.
Ôp nòr de vôlgende kieër!!

Jacky Krebbers

 

De vurstelling

D’n urste kieër dat ik mit moog doen àn de eindvustelling, zal beej de bouwploeg van toen nog stevig ien et geheuge zitte. De bouwploeg bouwde ‘n buun ôp de kòpse kánt van de groeëte tènt. En dan wel òvver de hieële brette. Óvver die hieële brette hin, zeas dat ien ieder theater ‘voorhang’ werd genoemd, ‘n gerdien dat dur twieë, ien prachtige klier gestaoke, jônge vrouwe wier bediend. De vurstelling van de bouwploeg kôs beginne. Et stuk dat ôpgevoerd zuj werre, zaat iengewikkeld ien mekaar, was duudelek, mar vurál kort. De hoofdpersoeën was ennen iendrukwekkende koning, hoeëg gezète ôp zienen troeën. Zien rôl bestoond allieën uut ienteressánt et publiek ien kieke en vurál nie iemprovisiere.
Dees rôl wier toen nog dur Tinus “reuzenbaby” ôp iendrukwekkende wieze gespuld. Zien vôlk bestoond uut allieën mar kèls, die schitterden dur allieën mar mit dikke stök ôp et podium te stampe. Eur enthousiasme was grenzeloos. De ‘waordeschat’ van et vôlk was nie ze groeët. Nao veul rippetiesies hàn ze mit ‘n iezersterk durzettingsvermoge et waord “Oenka” van buute gelierd. Ôp dees prestasie ware ze keitrôts. Oonder de gánse vurstelling wier dan òk “Oenke,Oenka!” geroepe. Ritmies begeleid dur hard en driftig mit de stök ôp et podium te ramme. Jan Groenen en Grad Sijbers ware de vokale ànvoerders. Nog enne greep uut et rieke vurstellingsverleeje van de bouwploeg. Et circus. Dees vurstelling hai ‘n schitterend décor dat dur John Eickmans ien twieë daag was gebouwd. Dur Zien vakmanschap wier et podium zewel baove as van oondere àn drie kánte bekleid mit iengewikkeld gevouwe stof. Wiedeweg et moiste décor uut de gánse serie. De bouwploeg spulde de diere uut et circus. Bart Groenen hai ‘n centrale rôl. As “Pierrot” gezète ôp ‘n kruk môs heej oonder de vurstelling vaag et publiek ienkieke. Mit groeëte toewijding bròcht heej die rôl òvver et voetlicht. Alwèr ‘n vustelling zoonder tekst. De bouwploeg môtte nie beláste mit tekste liere. De bouwploeg bouwt! Zoeë is dat now ieënmòl en dat is goed. As ‘s aoves de kretjes uut de koelwage werre gehàld, werd d’r niemèr gebouwd en dan kômme de tekste en òk dat is goed. Tôt slôt wil ik nog ieën vurstelling ien herinnering roepe enwel de bieëste ien et zwembad. Daorien spulde Werner ‘n absuluute hoofdrôl, dur as enne groeëte loeëpvogel mit de koont nòr áchtere, zien buukske nòr vuur en de erm gevouwe as vleugels ien et zwembad roond te stappe. Dees ekt begeleide heej cônstant dur “kwiet, kwiet” te roepe. Ik vuul nog de krámp ien mien boekspiere van et lache.

Jan Brandsma

 

KVW spulle

Ien de loeëp van de jaore hebbe weej as bouwploeg òk steeds mieër wèrk d’rbeej gekrege umdat weej alles ien eige beheer hebbe. Zoeë hebbe weej al zun 8 ôpleggers/wages ôpgeknapt beej Klabbers/Roodbeen en Laarakker. De mèrtkröm zien verdubbeld en schôtte d’rbeej gemàkt zedat weej gèn kröm mèr hoefden te hure beej Manders Venray en kratte beej Haumann kunne kriege vur d’roonder te zette. Later zien d’r nog schage gekaocht um d’roonder te zette en wiere de kratte ien de tènt gebruukt vur rômmelmèrt en buun. Òk hebbe weej veul gelast àn de zeile en tènte. Vurál Arno en Jan hebbe d’r hieël wat ure ien gestaoke.
Zoeë hebbe ze ‘n jaor oonder de kiendervakánsiewerk wèk eur eige zeilmakerij gehad ien de tènt van de perdeklup wòr ze toen daag lang àn et repariere zien gewest àn zwembadzeile, mèrtkrömzeile en tentzeile. Zoeë hebbe weej mit veul mankracht al hieël veul klaor gekrege vur wennig kooste. Zoeë was d’r vur iedere klus groeët of klèn áltied wel iemand te viende die of dèn raod wis.
En zoeë is et KVW langsaam gewòrre wat et nòw is en haopelek nog lang blieft.
Durrum nog enne kieër vur iederieën die of dèn zich daorvur het iengezet: HARTELEK VEUL DAANK!!!

Ald bouwploegsjef
Jan Groenen

 

De allerklènste

Vieftig jaor geleeje liep ik al mit oonze pap òvver et 1e Kiender Vakánsie Wèrk: ‘n kermis ôp et terrein van de álde tuinbouwschòl.
As hulpke gruide ik daormit ôp: hulpleiding beej de kleuters, leiding beej de wat gröttere kiender, enne kieër beej de handvaardigheidstènt……..‘N àntal stopjaore……. Mar toen oons jôngste dochter as peuter mit moog doen, begôs et wèr te kriebele…… Sinds 2003 was ik ieder jaor de váste kracht beej de peutergroepe. Heerlek mit die kleintjes um meej hin! Et leuke hieràn was òk, dat ik al kennis màkte mit mien toekômstige lierlinge!
Drie gezellige daag mit:
        -huufkartocht (en mit fruithepke ôp de kar)
        -‘n culturele vurstelling
        -tummere, kralenriege, knutsele, verve (lekker knôddele)ien de handvaardigheidstènt
        -vurbereidinge treffe vur et ôptreije ôp d’n letsten dag
        -springkusses, sturm -en kabelbaan…….
        -tussendur pannekuuk ète, friet of bôttràmme, ‘n ieske en hieël veul Ranja dreenke…
 Mar meistal ware die peuters te viende ien d’n eige zándbak, et peuterzwembàdje en d’n ballenbak. Àn die peuters hàdde dan ‘gèn kiend’!
Die drie daag vloge um mit veul schik en gezelligheid!!!

Groete van José van Soest - Reiniers.

 

Broeëd bakke

Vôlges de KVW site zien de kiender ien 1976 begôs mit broeëdbakke! Dat was oonder de bezielende leiding van Jan Janssen(‘t bekkerke) en nie veul làtter Gerrit Kessels.
Ze hàn de leiding òvver de bakploeg. Gerrit was de man van et broeëdbakke. Heej was ‘n àntal jaore bekkersknècht beej mien vader, Wim Janssen. Ik meen te wieëte dat weej toetertied tegge de 400 böllekes dieëg leverden. De kiender voonde en viende et geweldig d’n ieëne groep nao d’n ándere verzámelde zich roond de vuurkörf (ien et begin) en nòw ennen briejen bak mit vuur. Ik wieët nie of d’r toen soep wier geservierd, nòw is dat ‘n lekkere tomatesoep mit böllekes die verwermd werd ien enne groeëte kètel àn ennen driepoeët bòvve ècht vuur. Òk Hans Simons was ‘n àntal jaore van de partij. Ikzelf heb ien die beginjaore helaas nie mit kunne helpe dur drukte ien d’n zômmertied. Cafees en restaurants zeas Onder de Linden, Walaria, ‘t Ankertje, Vink, De Wellsche Hut, de Grote Waay, Gloggy, Het Leukermeer, Het Veerhuis (Nellie Drissen), De Bergse Heide!?, ware allemòl nog vôlôp ien bedrief. Òk nie te vergète de diverze scouting groepen. Ien 2018 heb ik daadwerkelek mitgehôlpe, wat ik erg leuk voond en wat meej betreft  geröst ‘n vervôlg mug hebbe.
Rest meej et KVW van harte te felicietiere mit et 50 jurrig jubileum.
Gòt nog lang dur mit dit moie wèrk.

Karel Janssen

 

D’n letste groep

Wiste dat…..
….. Ge naodat geej afscheid nimt van de basisschòl òk afscheid nimt beej et KVW?
….. De woensdgaovend start mit ‘n huufkartocht richting Leukermeer um te waterfietse?
….. De leiding áltied ennen “högere hulplijn” ienschakelt (ien de vurm van Henk) um de kiender toe te sprèke? “Gillie mugge  NIE van de waterfiets af um te zwemme, want dan kunde metieën nor huus!”
….. D’r werkelek ien ál die jaore nog noeits iemes “te water” is geràkt?
….. D’r ôp woensdagaovend enne ‘escape room’ is gemàkt ien ieën van de ôpleggers van et KVW?
….. D’r ôp woensdagaovend al ‘n àntal jaore enne ‘mysterie guest’ werd uutgenuuëdigd?
….. De woensdagaovend mit òvvernachting en spoeëketocht 25 jaor geleeje(vur meejzelf) al berucht was?
…..Ge dèn woensdagaovend en nácht noeits mèr vergèt (ienklusief kettingzaag, koeieoeëge en bloederiggen Dracula)
….. Et feit dat et mierendieël van de kiender van groep ácht zich al ziek zwak en misselek vuulde vurdat d’n tocht begôs, et bestuur deuj besluute um de spoeëketocht te verándere ien ‘n diergeluidenspel?
….. Kiender mit de grötste moond , piepklèn wiere mit zunne tocht?
….. D’r geslaope wèrd ien de groeëte handvaardigheidstènt?
….. Of, now jao…..òk sôms nie geslaope werd ien die groeëte handvaardigheidstènt?
….. De schòlverlaoters durrum ôp d’n dônderdag zun klène uuëgskes hebbe?
….. D’r ien de loeëp van de jaore van alles veránderde, mar dat dèn woensdagaovend vur de 8ste groepers iets mágies blieft hebbe?
….. KVW mit zunne magiesen letste kieër kan zörge vur neejen ànwas hulp -en hoofdleiding vur de toekômst?
(Zoeë ziej ikzelf òk blieve plekke)

Laura Janssen

 

AXITRAXI

Zitte weej dan ien Maud eur huus ien Rôtterdam.
Mit ‘n glèske wien ien de hánd hale weej oons herinneringe àn Kiendervakánsiewèrk ien Well nòr baove. Al 12 jaor lang reize weej ien de twedde wèk van de zômmervakánsie af nòr et moie Well. Oeïts begôsse weej as hulpleiding en nòw zien weej al hieël wat jaore gepromovierd tôt hoofdleiding. Meistal werre weej iengedèld  beej de kiender van groep 6/7. Ôp mòndag begint dan al de vraog: “wat is dit jaor de AXITRAXI?” Ôp dinsdag keumt dan de vraog:”Hoe laat mugge weej ôp de AXITRAXI?” Ieder jaor stòn de kiender wèr te popele tôtdat ze d’r vur et urst vanaf mugge. Weej echter hebbe áltied úrst wat káldwatervrees, stiekum wille weej wel mar dat urste reundje bekieke weej veilig vanaf de ziejlien. Van De AXITRAXI kômde nie zoonder klieëscheure af. As leiding hedde dan áltied de oere en oeëge ope. “Nie trekke, noe douwe!”, of de bekende uutspraak: “weej zien àn de buurt!”. Nao d’r ôp dinsdag enne kieër vanaf te zien gewest, is de èngst ôp woensdag vur de survaivel vedwene. Alle zeile beejzette, van schoerende bieën tôt pien àn de vuut van de klimtouwe. Ôp dônderdag nog gauw ‘n reundje vurdat de vurstelling begint. Dit jaor, d’n 13e en letste kieër stòn weej wèr vôl spanning te wáchte wat de AXITRAXI oons zal brenge.

Maud Berden & Lieke van Elsen

 

KVW

Et KVW, daor ziej ik mit ôpgegruid. Vanaf mien 9e zelf ien groepe mitgedaon, daornao as hulpleiding en same mit miene Geert òk leiding van enne groep. Òk mitgehôlpe mit de verkoeëp beej de rômmelmèrt ien de groeëte tènt. En nao afloeëp dan duk moije fieëskes gebouwd!
Toen ‘n àntal jaore nie mitgedaon umdat Geert en ik oons vakánsie nie ôp et KVW af kôsse stemme. Mar et bloed kruupt wòr et nie gaon kan en toen dus toch wèr begônne ien de tènt beej de verkoeëp. Van et ieën kwaam et ánder en ging ik alle daag helpe beej de horeca mit koffie, thieë, schôttele wasse, uutdèle van versnaperinge àn de groepe, zeas pannekuuk, ieskes, sjips enz. En bôttràmme smère of eier bakke.
Zoeë ziej ik òk begôs um mit te helpe mit pannekuuk bakke, 3 daag ien de wèk van 9:00 uur tôt et ènd.De vraog nor pannekuuk wier steeds grötter, van heinde en verre kwame ze die koeëpe. Durrum wier d’r toen vanuut de bekkers en ien òvverleg mit de beslagmakers òvverlet um vroeger te beginne. Um 6:00uur ware weej mit ‘n vást gruupke, en moi òk, nog meense van et urste uur die daoràn mit wôn werke, paraat en bakten toen tôt goed half tien die lekkere kuukskes. Dan wiere weej afgelôst dur de moeders die eur kiender hàn gebròcht. As roond 7:00uur - 7:30uur d’n urste “terrein bewaker” wakker wier, duk mit enne duffe kop umdat heej mar hieël kort geslaope hai, zônge weej daor mit de bakploeg ‘n liedje vur: Begin de dag met ‘n dansje, begin de dag met ‘n lach, want wie vrolijk is in de morgen, die lacht de hele dag.
Dur de jaore hin wier d’r vur veul bouwers ète klaor gemàkt. Dat is uutgegruid nòr ‘n uutgebreidere maoltied. Weej hebbe mei mit ‘n paar vròllie vur wel 50 tôt 60 persoeëne (bouwers zelf mit eur gezinne, ien et begin vur niks, mar làtter tegge ‘n klène vergoeding, zedat weej daor d’n ienkoeëp vur kôsse doen) ‘n drie gange dienee gekòkt. Ik heb van kilo’s gehakt hieël wat böllekes gedreid, vur de böllekes ien tomatesaus.
D’r ware d’rbeej die van te vurre vroege wannieër de böllekes ôp et menu stoonde, dan kwame ze zeker ète. Òk lieters soep gekòkt, enne kieër ‘n geboonde bloemkoeëlsoep, d’r ware d’rbeej die, die nog noeits gegète hàn. Wat was et òk moi dat oonzen Henk (as menneke van 3 moog dèn aoveral mit hin) ien de voetspaore van oonze pap(ieën van de goondleggers van et KVW) treide dur òk vurzitter te werre!
Wat hebbe weej ien die 50 jaor moie dinge mitgemàkt en òk hieële moie herinneringe daoràn aovergehálde. Haopelek kan et KVW nog hieël lang blieve bestaon, ‘n hieël moi evenement, dat ze top kan dreije dur ál die vrijwilligers, die goold werd zien!!!
Gefelicitierd mit ôllie jubileum en gòt zoeë dur, nog hieël veul jaore!!

Marian Kusters-Reiniers

 

D’r was es…..

En is nog áltied….
’N Dörpke mit de naam Well.
Hier kwame weej 30 jaor geleeje woeëne. Toen weej kiender krege dun weej natuurlek mit àn de aktiviteite die d’r georganisierd wiere vur de kiender ien et dörp. Ik wieët nog dat ik ien de zômmervakánsie dur de Papenbèk fietste en dôcht… “Wat is et stil ien et dörp…. Gèn kiend te zien en dat terwiel et vakánsie is!.... Bleek làtter dat iederieën ôp et kiendervakánsiewerk terrein was. Zeiets hai ik ôp dees manier nog noeits mitgemakt. D’n ienzet van de elders, kiender en vrijwilligers. Fantasties um te zien. Vur oons kiendjes vuur en áchter ôp de fiets die nog ámper kôsse loeëpe was de hoeveulheid meense sôms nog wat òvverweldigend. Toen de kiender grötter wiere en nòr de peuterspeulzaal ginge moge ze vur et urst mitdoen. Wat ’n fieëst! Urst was d’r natuurlek Koninginnedag. De fiets versiere en d’rnao de spellekes ôp et voetbalvèld. ’N Gezellige heppening en alle kiender uut et dörp dun mit. Daornao ’n hieële wèk fieëst oonder de vakánsie. Ieën wèk wier afgeblokt en noom ik vrij um mit de helpe as vrijwillige elder. Òk Roger zette zich ien vur et Hamburgers en làtter pannekuuk bakke. Heerlek um die kleintjes te begeleide mit cultuur en creativiteit. En wat smieke die pannekuuk verrukkelek! Làtter ien et jaor was de sinterklaos ientocht àn de Maas mit steeds wèr ’n ánder tema. Ik herinner meej vurál de spanning ien die snuutjes. Nao afloeëp van die activiteite bedánkte ik et bestuur vur de fantastiese organisasie!
Dat heb ik gewieëte! ’N Jaor làtter dreijde ikzelf mit ien et bestuur van et KVW. Nòw, 30 jaor làtter is dat dörpke Well, oons dörpke Well, gewòrre mit veul moie herinneringe.
50 jaor KVW. Ik weens et huidige bestuur hieël veul sukses en haop dat et nog veul jaore veul vur oons Wells jeugd kan beteikene. Proficiat!

Marlies Wijnen

 

Mienen tied beej et Kiendervakansiewerk.

KVW is ’n avontuur dat ik same mit mien kiender heb mugge belève. Ik ziej begôs as leidster toen oonzen aldste zoeën mit moog doen beej et KVW. Dat spulde zich toen af ôp de “Vôssenheuvel”. Wat erg leuk was, was dat weej ècht nog van zelfgezochte spulle uut et bôs van alles bouwden en makten.Weej dun òk alde spelle zeas speurtocht, kabelbaan. ‘N luchtkusse was d’r al en d’r stoonde wat zwembàdjes. De kiender hàn d’n tied van eur lève wor ze et nog lang ovver hebbe gehad. Ik ziej enkele jaore groepsleidster gewest. Toen wier ik benaderd mit de vraog um et siccretariaat ôp meej te neme. Dat was hieël anders mitdoen àn et KVW. Et was veul werk. Dat begôs al ien et naojaor mit de urste vurbereidinge vur de zomer van et vôlgende jaor. Mar weej dun alles vur dat moie fieëst dat zich ieder jaor afspulde ien et dörp. Ik zaat vortàn ieder jaor ôp d’n högste stoel ôp et KVW beej d’n ienfo! Mien kiender voonde et èvegoed leuk want ze wisse meej te viende en kwame regelmaotig mit enthousiaste vehale. Weej zien toen mit et KVW van terrein gewisseld nor et terrein achter “de KUBUS” (vroegere sporthal). Dat was òk ’n moie lokasie en et hieële dörp belèfde die wèk van et KVW mit. Iederieën was betrokke en veul bezuukers kwame nòr et evenement kieke.Et wier allemol wat luxer wat betreft attribuute, krömkes en tente. D’r kwame ien de loeëp der jaore òk steeds mieër kiender waordur dat terrein òk wèr te klèn wier. Weej wisselden ôpneej van terrein en verhuusden nòr et evenementen terrein dat nog steeds dienst duut. Prachtige lokasie en alle ruumte. Plàts genoeg vur de rômmelmert ôp zôndag, moie tradisie, genoeg parkierplàtse. Ruumte vur alle tente en krömkes wat ieder jaor veul bezuukers trekt. De brôn van ienkômste.Vanaf mòndag begôs et fieëst vur de kiender. Vier daag lang. Spelle, zwemme, klimme, vurstellinge, knutsele enz. Ôp woensdag survaivele, wat iederieën supervet voond en waor òk plàts genoeg vur was. Tussendur de zefgebakke pannekuuk die tôt ien de verre regio van Well hieël bekend zien. Daor kenden de keinder meej o.a. van en ze riepe dat ôp straot nog altied nor meej. Moie herinneringe zien dat. Ik ziej 10 jaor siccretaris gewest tôt de jôngste van oons groep 8 ging verlaote en ik et moi gewest voond. Ik heb et stökske aovergedrage àn de jôngere generasie die d’r nog vers ien stöt. Zoeë huurt et te gaon en zoeë blieft et bestaon. Hielemòl heb ik et nie verlaote. Ik ziej nog ieder jaor te viende ôp de rômmelmert en goi d’r regelmatig koffie dreenke en aoverheerleke pannekuukskes ète en de kiender ànmoedige. Et moie is dat ik ienmiddels klènkiender heb waorvan et aldste now vur et urst mit mug doen. Zoeë bliefde toch nog steeds betrokke en mienen harteweens is toch wel:
“DAT ET KVW NOG LANG BLIEFT BESTAON!”

KVW PROFICIAT!! Groetjes van Mia Simons

 

Pannekuuk!

KVW um 6 uur ’s mèns pannekuuk bakke. De koekbeslagmakers hebbe dan al ’n paar bek beslag klaor. Um vief òvver zes stöt de urste tas koffie nève de panne en um tien òvver zes hebbe weej al zes pannekuuk de man gebakke. Weej stòn mit zes man te bakke ieëne kok en ieëne ienpakker/beslagemmer vuller. Stil is et ’s mèns noeits. Weej duun oonder et bakke môndeling de wèreld verbètere. En verder keumt d’r gèn zinnig waord uut. ’N Klèn (ieën van de veule) anekdote: Iemand kwaam ’n paar jaor geleeje ôp et idee dat as iemand van de bouwploeg roond ’n uur of acht binnekeumt ien de groeëte tènt vur ’n tas koffie, vurdat ze beginne te zinge et liedje: “Begin de dag met een dansje, begin de dag met een lach”. En dat iedere kieër as d’r enne binne kwaam. Mar nao 25 kieër keke ze nog steeds smerrig nòr oons.
Roond 9:30uur-10:00uur wiere weej afgelôst dur de vôlgende ploeg en ginge weej zitte en geniete van ’n tas koffie mit enne pannekoek.

Mien Hagens
 

Friet bakke…

Weej hàn zelf nog gèn kiender, mar schònbruur André en schònvader Wim voonde dat weej oons vakánsie mar nuttig môsse besteije want beej et KVW kôsse ze nog wel vrijwilligers gebruuke.
Dat dit ôngevèr 20 hieël gezellige jaore wiere wisse weej toen nog nie!
Grad kwaam as vervanger vur Jan Roersch en ik wier as stagiair iengedèld beej de friettènt.
Ien de lier beej ervare frietbaksters Jeanne Nijsen, Tilly Lemberg en Marjo Thijsen.
Weej bakten beej de Kubus oonder ‘n zeil dat dur de bouwploeg vakkundig gespanne was. Daoroonder stoonde 2 groeëte lôsse horeca panne.
As et gerègend hai môsse weej urst mit d’n bessem umhoeëg um et water uut de zeile te douwe, wat dan as enne tsoenamie umlieëg storte. Ècht, super veilig, ha, ha!
Latter ôp et evenementeterrein wier d’r ennen èchte frietwage nèrgezet dur “Hendrik d’n Tieën”. (Tissen)
Oondertusse ware die dames d’rmit gestopt en vörmde ik jaorelang ‘n frietteam mit José Handrickx.
Et toeval wil dat weej allebei ôp 29 juli jörrig zien, wat toen geregeld oonder et KVW was.
De kraom wier dan dur de bouwploeg moi versierd mit slingers en ballônne…., en weej krege ‘n serenade van et gánse terrein vôl kids…
Hieël wat frietzekskes hebbe weej gevouwe en ik heb áltied ôntzettend genote van die glunderende kids die heerlek tôt ien et oonderste peuntje ginge mit eur “schònne” hánd, um de letste majo d’ruut de scharre.
De hôngerige jeugdleiding wis oons áltied te verleije um ielegaal ‘n ekstra friekandelleke te skore vur eur hôngerige pubermage.
As ge ‘s aoves muuj mar vôldaon ien bed let, huurde ge nog steeds dèn mikrofoeën ien ôw oer…. De friet vur groep 4 is klaor!!……
Ik heb áltied ôntzettend genote van dees superwèk en haop dat dees tradiesie nog jaore vortgezet zal werre mit net zeveul plezier en entosiasme as weej dat toen hebbe gedaon.
Gràd en ik feliesitiere ôllie van harte mit 50 jaor KVW.

Monique Sijberts

 

KVW foto’s

Al vrij vroeg ien et jaor belde Henk Reiniers um d’n datum van et KVW van dat loeëpende jaor dur te gève mit et verzuuk um ôp dinsdag dan de groeps foto’s te make.
Umdat ikzelf al jaorroond mit EWC en de Maasjoerts bezig was, ziej ik genne KVW vrijwilliger gewest. Wel môs ik beej d’n baas vrij vraoge um ôp dinsdag te kunne fotografiere. Dat het d’r weles ien geresultierd dat d’r ien Hórst dèn dag gennen ambtenaar Burgerleke Stánd was en dat d’r ennen rechtstreeksen hotlijn môs zien tusse et gemeentehuus van Hórst en KVW Well.
Mar et is toch gelukt van 2005 t/m 2020. Helaas is mien lichameleke gesteldheid niemèr ze goed dat ik ôp dat hobbelterrein nog uut de vuut kan.
Die groepsfoto’s môsse dinsdaggemerge gemàkt werre, dan nòr huus, uutzuuke, bewerke en nòr Venroy brenge um af te drukke.
Twieë daag làtter ware ze 13x18 afgedrukt en uutgereikt àn ieder van de kiender en vrijwilligers.
As ik nòw nòr veul foto’s kiek en ál die blieje gezichte ziej, mar òk meense die d’r nòw nie mèr zien, dan krieg ik nostalgiese gevuules. Mar òk deenk ik dat et gistere hai kunne zien, mar dat et feitelek wel 17 jaor geleeje is.
‘N monument van ‘n aktievieteit ien Well, vur de kiender van Well, dur de vrijwilligers van Well!
Háld dat zoeë vurál vôl!

Nico Sijberts

 

KVW Well

‘N prachtig en gedenkwaardigen tied mit ‘n biezoonder momènt dat ik noeits mèr zal vegète.
As elder van drie kiender heb ik meej urges ien et vurjaor van 1996 àngemeld beej et KVW, beej de bouwploeg… en dat heb ik metieën dat jaor gewieëte.
Ônmiddelek wier ik àn et wèrk gezet um mit de ándere van de bouwploeg ‘n èrg lange kabelbaan te bouwe en et resultaat moog d’r zien. Ik wis vur 200% zeker dat die kabelbaan zuj wèrke.
Vergète was ik dat de kiender ‘n stuk minder zwaor zien dan weej, jônges van de bouwploeg.
Dus ál die lichtgewichte van kiender kwame lang nie beej et eindpeunt van die kabelbaan. Mien mede bouwploeggenote zèn meej dat de kabelbaan dus nie vur 200% werkte. Ik zei daorôp mien verantwaordelijkheid te neme en zoeë zette ik meej vur 200% ien um alle kiender nòr et eindpeunt van de kabelbaan te trekke. Per kiend was dat ôngevèr 10 mèter. Dat was dus ien d’n tied dat d’r ôngevèr 2x zeveul kiender ôp de basisschòl zate dan nòw….. en dat zien d’r erg veul. De kiender voonde et ‘n prachtige belèving en wôn durrum nòw òk dukker. En zoeë heb ik et gewieëte, ik was iederen aovend kapôt muuj! Uutgeteld, mar zeker genote! Ieder jaor wèr ôpneej t/m 2006.Terug nòr d’n oertied en et pure lève, speultoestelle ôpbouwe en afbrèke, terrein ôpruume, tènte ôp -en afbouwe, rômmelmèrt ôpbouwe, grei ôphale beej de meense en d’rnao wèr alles afbrèke. En dan dèn spoeëketocht. Prachtig was dat um de kiender van groep 8 (vurzichtig) de stuupe ôp et lief te jage. Die rôl noom ik òk erg serieus. Jawel huur 200%.
Och, weej dun veul mieër dan dat en ik heb moie biezoondere meense liere kenne, waormit ik vriendschappe sloot.
Ieëne daorvan was John Eickmans. Heej wier ‘n bouwploegmaatje van meej en weej krege binne die bouwploeg gezameleke dieëltake. John stelde zich vur meej ope en dèlde òk zien probleme. Daormit sloot ik um ien mien hart, waor heej nog áltied ànwezig is. Ôp 24 augustus 2002 besloot John uut et lève te stappe en dat huurde ik ennen dag làtter. Mien hart braok en zoeë schreef ik zien vrouw Rieky ôp 17 november 2002 ennen brief. Dèn brief het Rieky nog áltied en ik vroeg eur um meej dèn te maile. En zoeë lèsde ik ien dèn persoeënleken brief ôp 31 mei 2022 alles nog es trug, wat meej ennen brok ien miene kèl ôpleverde. Nao zienen doeëd was John duk miene “stille begeleider”, zelfs beej mien zakereize en vakánsie ien 2002 ien Oosteriek. En dat voond ik dus trug ien mienen brief. Toen mede bouwploeggenoot Jan Brandsma , Rieky oonder et KVW ien 2003 ‘n dör um prachtig geschilderd portret van John òvverhandigde zaog ik de puurheid van die bouwploegjônges. Stoere Vikingboonke zeas ik ze toen zaog, bökten as klène jônges beej die òvverhandiging. Net as ikzelf trouwes. ‘N emosionele gebuurtenis die boekdieële sprikt. Prima kèls, net as John Eickmans.

Pierre Linssen

 

De kabelbaan

Spannend vur de kiender, mar zeker òk vur de bouwers. Ien de oeëge van de kiender liekt de kabelbaan namelek ieder jaor etzelfde, mar dat gèld nie vur de bouwers van de kabelbaan.
Vur die is ieder jaor wèr ‘n uutdaging, durrum is d’r afgeloeëpe jaor ‘n dreiboek mit foto’s gemàkt  zedat et vur iederieën duudelek is hoe de kabelbaan gebouwd kan werre en wat vun materiale daorvur nuuëdig zien. D’r is namelek òk ‘n jaor gewest dat d’r zeveul steigermateriaal gebruukt wier dat d’r daornao te wennig aoverbleef vur de roetsbaan beej et zwembad. As weej alle materiale beejèn gevoonde hebbe en et dreiboek durgenome is, kunne weej beginne.
Weej starte mit et uutzuuke van d’n boeëm wòr de kabel àn môt, want welke was dat òk alwèr? En waor make weej et ènd àn vást? Òk hier is alles wel enne kieër al vur gebruukt. Van ôplegger, kônteener tôt vrachtwage. D’n taore wert gebouwd en vurzien van stevige schoore, ‘n trap en ‘n veilige leuning. As de kabel gespanne is, dan wert et ènd van de kabelbaan gebouwd zedat de kiender áltied ‘n záchte landing hebbe. Daor gebruuke weej meistal ‘n matras vur. Die hale weej trouwes niemèr ôp vur de rômmelmèrt, dus waor die vandàn keumt ieder jaor wieëte weej zelf òk nie zeker…..
As de kabelbaan dan eindelek klaor is, wèrd ze getest dur de kiender van de bouwploeg. Meistal göt de test goed en löpt ze nao wat af en beejstelle perfekt.
Ien de wèk van et KVW oonder de leidingbesprèking hebbe weej et òk áltied òvver de kabelbaan. Dan kômme ze mit de vraog of d’r efkes iemand nòr wil kieke. Heej môt dan gespanne of minder gespanne werre, sôms göt ze te hard of juust te langsaam. D’rnao zegge weej dat weej um ánders afgesteld hebbe. As reaksie kriege weej dan ‘n daankewel en ‘et göt veul bèter zoeë’. Van binne lache weej oons dan kapôt, want weej hebbe d’r hielemòl niks àn gedaon.
De kabelbaan blieft iederen dag en ieder jaor wèr verrassend vur jông en áld. En vur allemòl ‘n ônmisbare atraksie ôp et KVW.

Roel Koppers

 

D’n uuttocht van et KVW.

Ien de beginjaore dat ik d’rbeej was ginge weej dônderaovend mit 2 tractors en 2 vrachtwages richting et KVW terrein àn de Wezerweg.
En toen stoonde d’r gèn meense nève de weg te kieke…….
Mar ien de loeëp van de jaore wier et steeds mieër materiaal.
Vanuut et KVW dus steeds mieër: karre, ôpleggers, vrachtwages en natuurlek òk d’n álde tèntewage dèn nog steeds werd gebruukt.
Mar òk mit de jaore stoonde d’r steeds mieër meense nevve de kánt te kieke nòr dèn stoet.
Mar nòw, 50 jaor làtter, is et enne geweldigen ôptòcht gewòrre, mit 5 vrachtwages mit ôpleggers 4 of 5 tractors mit karre en dan òk nog wat auto’s mit karre, et is ennen èchte klènen ôptocht gewòrre en gehuurt ze nevve de weg deenke en sôms òk jauwe: “Jaoaoaoaoaoa, et kiendervakánsiewèrk göt wer hòst beginne en weej as kiender hebbe dan wèr ‘n wèk veul lôl en plezier!!!!!”…… zoeë stòn de kiender mit de elders nòw dônderdag ‘s aoves nevve de kánt te zwaaie. Mit de toeters òvver d’n Rijksweg nòr et evenemènteterrein ôp de Wezerweg en vur de bouwploeg ‘n supermoi begin van ‘n geweldige wèk KVW.

Ald chef Ron Verrijdt.

 

Van kvw nor KVW.

Ien 1997 moog ik et vurwaord schrieve vur et jubileumbuukske van 25 jaor Kiendervakansiewèrk.
Now, 25 jaor làtter, ziej ik de groeëte verschille tusse toen en nòw. Wat hebbe de pioniers van dit geweldige evenement toch môtte iemprovisiere en waor hàlden die toch al die materiale vandàn? Dan ziede hoe ’n klèn dörp, enorm groeët kan zien mit steun van alle plàtseleke bedrieve die zeveul materiaal, materieel en vrijwilligers leverden.
Zoonder dees vrijwilligers en de steun van bedrieve hai dit evenement noeits ze groeët kunne werre as et nòw is. Ik heb dan òk groeëte wardiering vur de initiatiefnemers van et urste uur en bedaank ze hartelek vur et ôpzette van dees wèk.
Nòw het kiendervakansiewerk alles ien eige beheer, vanaf de tènte, springkusses, zwembad, mertkröm, en de klène groepstente tôt en mit de ôpleggers waorien alles ôpgeslage en getransportierd werd. Bovvendien òk nog ’n organisasie die alles perfect prebiert te organisiere en te regele. Dat dit nie altied lukt is nie ze èrg, et blieft nog altied meensewerk.
Veul zulle d’r zegge “dat is de vuuruutgang” en dat klopt òk wel, mar vroeger was et òk al ’n geweldige wèk , waor mei òk vanalles mis ging mar ôp dônderdagmiddag/aovend fietste toch iederieën mit ennen big smile van oer tôt oer nòr huus.
As meej iemand vruugt “wat en wie zien die vrijwilligers?” dan kan ik mar ieën antwaord gève:

KÔM ES KIEKE BEEJ ET KIENDERVAKANSIEWÈRK!!!!

Nogmaals wil ik iederieën die ien ál die jaore zien of eur beejdrage het geleverd, ien wat vun vurm dan òk, hartelek daanke, want zoonder ôllie is dit ècht nie meugelek.

Sjef Anderegg

 

KVW Well 50 jaor.

Mienen tied beej et KVW begôs ien 1983 beej Roodbeen ien et bôs. Mit ’n paar man ôpbouwe en de kiendjes laote geniete. Et moiste wat ik daor heb mitgemakt was mit ôpruume dat Jo Veenk vroeg wòr eur keukestuul ware gebleve. Hermans Peters Rit zei “welke?” “Ja die eike stuul” zet Jo. “Ohhhh, vôlges meej ligge die al ôp d’n brándstapel”. De rest kunde wel deenke……
Toen nòr et dörp toe. Dat was hard peze mit dat gruupke wat weej toen hàn. Tènt bouwe ôp et plein, nao de rômmelmèrt wèr afbrèke en metieën nòr de Vossenheuvel en direkt wèr ôpbouwe vur de mòndag. ’s Aoves warde kapôt. Van et dörp nòr de Vossenheuvel, Kubus en nòw et evenementeterrein. Beej de Vossenheuvel woi Toeën Roosen zienen auto truguut zette en wel mit vôlle vaart, allieën hai heej nie ien de gate dat zienen ànhenger d’r nog áchter hông. D’n henger stoond toen ienèns nève zienen auto en nog krege weej daor de scheuld van. Mar ja, weej kenne Toeën. Beej de Kubus môste allieën ôplette dat ge nie oonder de vuut wierd geloeëpe dur die massa’s meense die ôp de rômmelmèrt afkwame. Van daoruut nòr de Wezerweg. Prachtige lokasie. KVW wier moderner. Super tènte, moije krömkes, goei horeca gelegenheid en super organisasie mit veul vrijwilligers. Nao jaore ien de bouwploeg te hebbe gezète ging ik de verkoeëpploeg ien mit de rômmelmèrt. Preciezer: De meubelboelevaar. Hieël lang mit Ger, Ruud, Geert en Agnes urre meens. Dreamteam. Weej verkaochte nie alles mar wel veul. Wandelwages prebiere àn te smère, waorôp ’n denneke zei “mar ik heb niks vur d’rien”. “Òk daor kunne weej vur zörge”, zet Geert. Fietse wiere d’r ôp dèn dag mier verkaocht dan beej Karel Dekkers. Gon Verhaeg ging nòr huus mit enne kachel ôp d’n drèger. Cômpleet tuingereedschap, tuinmeubels mar òk de gekste dinge ginge de tènt uut. Tinus Peeters verkaocht enne fiets. “Dèn pèst nie ien d’n auto”zet de koeëper. Tinus vouwt de fiets dubbel:”Nòw wel” zet Tinus. Piet Selten ziene wielrenfiets môs d’r òk àn geluuëve. Dus Piet kôs ’s aoves te voet nòr huus. Ál mit al heb ik ien die 36 jaor hieël veul schik gehad en ik zal òk áltied de mèrt kômme bezuuke. Hieël fijn dat d’r zeveul vrijwilligers zien en ik haop dat et KVW d’r nog wel 50 jaor àn vást mug plekke.

Groet allemòl Tinus Cornelissen

 

Ien de knutseltènt…

Ien de knutseltènt, aovergenome van wijlen Piet Welbers (jòmmer, fijne kèrel) mar wat ik daor mitgemàkt heb mit de kiender viel eigelek wel mit, d’r zien d’r áltied wel beej die gèr knutsele. Mar ik hai sôms mier wèrk mit de elders, d’r ware papa’s beej, nòw…. Die hàn twieë linkse hánd. En tegge sômmige moeders môs ik zegge dat et ien die tènt kwa knutsele wel um de kiender gông. Hoe fanatiek die mama’s ware. Lache!!!
Mar òvver et algemeen enne moien tied en ge snapt wel as ge de beejgevoegde foto ziet dat ik mien gemak môs hálde tusse ál die dames. Hahahaha!!!

Groetjes van Toeën Roosen